النائب العام

 موضوع النائب العام ده عامل زي سؤال هاملت الشهير بتاع اكون او لا اكون ؟
مبدئيا كدا لازم نتفق ان كل الناس عاوزة عبدالمجيد محمود يمشي و يغور في داهية ؟
هو كويس وحش مش موضوعنا انا شايفه ان اداءه سيئ جدا ازاي يسيب كل القضايا دي توصل للمحكمة بدون ادلة اتهام قوية قضايا مهلهلة من الاخر
 كان من الافضل ان يطلع بيان و يقول انا مش قادر احول اي قضية للمحكمة التحريات غير مكتملة و الادلة ضعيفة و لكنه اختار الطريق الاسهل حولها للمحكمة و يبقي ربنا يحلها ساعتها
قدامك حاجة من اثنين يا اما انه مهمل في شغله او متوطأ اختار حسب قناعاتك ؟؟ الحاجتين دول يخلوا يمشي و يغور بس يمشي ازاي ؟؟؟
هو ده السؤال الهام
القانون بيدي النائب العام حصانة
و النائب العام متمسك بمنصبه علي اساس انه مغلطتش  بصراحة مش عارفة هو شايف نفسه ازاي ؟؟؟
طيب ايه الي المفروض يتعمل ؟؟؟
حل من اثنين
1- مرسي يعرض علي النائب العام منصب اخر و يقبله و يمشي
حل شاعري جميل و يبين سيطرة مرسي علي الاحداث
بس ماذا لو؟؟؟ قرر النائب العام ان يفتح قضية مهمة تخص احد المسيطرين علي السلطة يعني يجيلنا نائب عام محترم و يقرر يفتح ملف واحد من تايكونات الفساد
و يعرض عليه الرئيس يكون سفير مصر في بروناي ؟ يا تري موقفك حيكون ايه؟؟؟
2- ان النائب العام يمشي لوحده من نفسه مش مطروح الرجل ماسك في المنصب بايديه و سنانه

مافيش حد عاوز النائب العام يفضل مافيش داعي انه يتهم اتهام اي حد انه فلول و بيساند الظلم و العك ده
و زي ما دكتورة هبة رؤوف عزت بتقول هلي تريد دولة القانون ؟
الاجابة صعبة جدا علي فكرة

الاهلي

اول مرة اسمع عن كلمة التراس و اركز معاها في احداث السفارة الاسرائيلية في مايو 
شيكا :)))
توالي بعد  كدا متابعتي لاخبار الالتراس و اشتريت كتاب جيمي هوود عن الاولتراس
الاولتراس هو الفكرة و الروح الحرة 
في اي مسيرات كنت بحب امشي مع الاولتراس 
حماس جميل و صادق
اهم حاجة انه صادق
الاولتراس لما بيعملوا اي حاجة بيبقوا صادقين 
صدق صافي و نقي
بيقول للحيوان انه حيوان ببساطة شديدة 
هو حيكدب يعني 
مذبحة بورسعيد 
حد عارف كلمة حزن يعني ايه 
كلمة حزن بتتجسد و تبقي ثلاثية الابعاد ليها تقل و ريحة و طعم لما بفتكر بورسعيد
بابا الاتحاداوي القديم و اخويا الاهلاوي بيتفرجوا علي الماتش 
و فجاة مذبحة علي الهواء 
عارف تحس ان الشيطان بيضحك و انت سامع صوته 
فاكرة وش الضباط الي في الصورة كان فيه واحد منهم بيمضغ مستيكة و بيتابع الي بيحصل باريحية شديدة و بيتابع الي بيحصل و شبح ابتسامة بيتكون علي وشه
الوجه الكريه الحقير 
كل ما بفتكره بحس اني عاوزة ارجع 
انا كنت خلف الشاشة 
يا تري الي كان في الملعب حس بايه 
حس بايه هنا هي المشكلة؟
معلومة لهواة الكنب لما بتكون في موقع حدث و في ناس بتموت و انت سليم 
بيتكون عندك فكر غريب ان انت ما تستهلش الجنة 
ريحة الجنة كانت جنبك و ماشمتهاش
مامتش عشان انت ماتستهالش تموت 
حياتك بعد كدا هي عقاب علي ذنب 
الذنب ده مخليك عايش متعذب 
بعد فترة بتحس انك فضلت عايش لسبب 
و حياتك سليم و كويس كدا معناها انك حامل رسالة كونك شاهد عيان 
و مطالب انك تجيب الحق كانك حامل لحكايات و حياة كل الناس الي ماتوا 
سيكولوجية الموجود في موقع الحدث مختلفة تماما عن المتفرج 
لوم شديد للالتراس و مطالبات بالتعقل بيقابلها صريخ و عنف شديد
عنف في التعبير عن مشاعره عن فكرته عن كل حاجة 
كلمة اتقالت و ضحكتني جدا اخد الحق صنعة 
الظالم يا عزيزي لم يلتزم بالصنعة غير تركيبتي النفسية 
هو حضرتك معانا هنا و لا من سكان المريخ 
لو سمحتم كفاية لوم لومك مقزز و مقرف بتلوموا الضحايا وجهوا قليل من اللوم للسيد الضابط ابو لبانة عديم النخوة 
ماتش السوبر 
لواحدة جاهلة زي بشئون الكورة 
قعدت ادور علي يعني ايه ماتش السوبر 
لقيته ماتش بيتلعب بين بطل الدوري و بطل الكاس 
مبدئيا الدوري اتلغي بطل دوري ايه بقي
عارفين الغباوة و التخلف لما يتجسدوا
الغباوة = مبارة السوبر 
مبارة مالهاش معني لازم تتلعب من غير جمهور في استاد برج العرب 
ايه المعني بتلعبوه ليه 
ملحوظة صغيرة : الاهلي رفض اللعب كاس السوبر قبل كدا عشان حقوق الرعاة يع يع يع 
سبوبة يعني
و الاخ هباب البرك الي اسمه شوبير  و بقيت ارجوزات البرامج الرياضية 
شتيمة في الالتراس و قلة ادب
و في الاخر البهايم مشيت كلامها و الماتش اتلعب 
سؤال بقي لشوية اللاعيبة الوسخة الي لعبت 
بتبصوا لنفسكم في المراية ازاي 
اه نسيت انتم اصلا معندكومش دم 
اه لما تقعدوا في كافتريا و يجيوا واحد يشتمكم 
اه يا تري بصة الناس ليكم بارف حتاثر فيكم و لا بردوا ما بتحسوش 
رسالة:
ابني العزيز لو جيت دور علي اسامي لعيبة الاهلي و انبي الي لعبوا كاس السوبر يوم 9-9 -2012 في استاد برج العرب و لو حد فيهم لسه عايش ابقي تف عليه نيابة عني 
و اوعي تخليه يمسك منصب عشان هو ......( حط اي حاجة حقيرة اكيد حتنطبق عليه ) و تذكر ان الاولتراس هما اصدق من فينا اوعي تعاديهم 
و اسمع اجمل اغنيتين اتغنوا في مدرجات اغنية شمس الحرية و اغنية حكايتنا احفظهم كويس و خليك فاكر ان الشجعان بيقعدوا في الثالثة شمال 
سلام 

عن الزبالة و اشياء اخري :)))

في حملة حتبتدي اطلقها الرئيس المنتخب محمد مرسي لتنظيف الشوارع و الي حتستمر يومين الحملة اسمها من أجل وطن نظيف
هي الحملة كويسة مش وحشة 
تاثيرها حيكون عامل ازاي محدش عارف ؟
بكرة جمعة و رمضان و كدا حتنجح الحملة و لا لا مش عارفة بصراحة اتمني انها تنجح اكيد
بس هو فيه مشكلةصغيرة 
اني شايفة الحملة طفولية فشخ 
عارفين لما كنا صغيريين و نخلص الامتحانات و نرجع البيت و نقرر اننا ننظف اوضتنا و نرتب الحاجات و نتخلص من كل الحاجات الي ملهاش لزمة 
حد فاكر الاوضة بتفضل نظيفة لحد امتي؟؟
المدة هي هنا مربط الفرس 
من الاخر كدا انا حملة النظافة دي مش داخلو زمتي بقرش صاغ 
اول حاجة كدا 
انت لو انتقدت الحملة يبقي انت حتاخد مجموعة من الاتهامات المعلبة مالهاش اي 30 لزمة مهما كان انتقادك موضوعي
مبدئيا كدا 
انا كنت مع حملات التنظيف دي جدا لحد ما واحد من زميلنا حكالنا علي موقف يخليك تراجع كل قناعاتك عن الحملات الي بالشكل ده
بعد التنحي مباشرة بدات حملة تنظيف واسعة في كل حتة في مصر ناس كتير شاركوا فيها و كانوا سعداء بشدة 
في مدينة 6 اكتوبر في حديقة اسمها حديقة  الحصري قام الشباب بتنظيفها و لم كل الزبالة الي كانت فيها و لما الدنيا بقيت تمام و هما بيلموا حاجتهم طلع واحد كدا متعرفش منين و سال زميلنا ده انتم مش حتصلحوا موتور المياة الي هنا كمان 
و بعد حوار قصير فوجئوا ان الراجل ده طلع واحد من الي شغالين في الجهاز بتاع المدينة 
انا لما سمعت القصة دي فكرت بجد
احنا لمينا فلوس و كنسنا و لمنا الزبالة و دهنا الرصيف حلو اوي
بس دي مش شغلتنا دي شغلة ناس تانية 
شغلة واحد زي الراجل العبقري ده الي كان عاوزهم يصلحوا الموتور 
هو بيقبض مرتبه و مبيقومش بعمله لا بيانتخ و كان لا حياة لمن تنادي و اولعوا في بعض
طيب انا اعمل شغل الراجل ده ليه ؟؟
اساعده ليه انه يبلطج و يبقي نوع من البطالة المقنعة 
طيب نسيبنا من الموضوع ده 
و نقول اننا حنبتدي عهد جديد 
و لازم نشارك كمجتمع في بناء الوطن 
ماشي اوكيه 
سؤال بقي انت شايف ان دي الطريقة الي حنبني بيها  الوطن ؟
مش تقليل من اهمية الزبالة خالص 
بس من الاخر الحملة دي ضحك علي الدقون
حنزل الم الزبالة ماشي في بقي شوية اسئلة عاوزة اجابات 
1- الزبالة الي اتلميت دي حتترمي فين؟
اثناء الثورة في الشارع الي انا ساكنة فيه جبنا عربية نص نقل عشان تشيل الزبالة من الشارع ماشي شليتها بس رميتها في شارع تاني او مصرف او علي طريق برة البلد
معندناش مكان نرمي فيه الزبالة 
2- مين الي حيشيل الردم الي مالي الطرق سواء الدائري او الصحراوي او الطرق الجانبية ؟
و لو شيلناه حنوديه فين ؟ 
3- لحد امتي ؟ ايوة لحد امتي حنلم الزبالة و بعد ما اليومين دول يخلصوا حيحصل ايه؟ مافيش صناديق زبالة في الشوارع ما فيش طريقة مستمرة لجمع الزبالة يوميا 
يعني من الاخر كدا كلها يومين و ترجع ريما لعادتها القديمة و ترجع الزبالة تاني تغزو النواصي 
4- مقالب الزبالة الي وسط اماكن سكنية حتعمل فيها ايه ؟ مين حيشيلها ؟ مين يضمن انها مترجعش تاني


طب و الحملة دي اننا نكنس الشارع و نلم الزبالة و خلاص و لا فيه حاجات تانية 
من الاخر دي مش حملة بطل تدخين 
لو الرئيس مرسي و فريقه مش عارفين يخططوا لحملة زي دي يبقي ايه النظام يا ريس؟
مش حشارك اكيد في حملة التنظيف ؟
عشان حملة فاكسانة و مع ذلك اتمني انها تنجح 
يا رب اطلع غلطانة 


27-7- 2012

انتقاد الرئيس

انا انتخبت محمد مرسي !!!

هل ده معناه اني اطبطب عليه ؟؟ ادافع عنه عمال علي بطال 

بالنسبة ليا لا طبعا المواطن مهمته جعل حياة رئيس الجمهورية اصعب بكتير هو الي شغال عندي مش انا الي شغاله عنده

النهاردة لاول مرة حد الاقيه بيدافع عن محمد مرسي بالطيقة دي يمكن عشان النهاردة اول مرة انتقد بعنف 

ححكي الحكاية كدا براحة 

بعد ما تم انتخاب مرسي ماسورة من السعادة فرقعت في الاثير الانترنتاوي و بالذات علي الفيس بوك 

انا كمان كنت سعيدة عادي يعني 

بدانا المرحلة الي وراها محمد مرسي بيصلي الفجر و بيشتري بقسماط  محمد مرسي بيعيط في الصلاة محمد مرسي بيعمل و بيسوي

بصراحة كنت مبسوطة جميل لما تحس انك مش الوحيد الي مش بيعرف تتصرف في العالم ده موضوع الصلاة ده ماكانش عاجبني بس اهو من باب الانبهار التغير رئيس بدقن و مبيصبغش ده في حد ذاته انجاز

بعد كدا دخلنا في مرحلة النفخ بقي 

اخبار محمد مرسي مقترنة بكمية كبيرة من النفاق و التزلف لدرجة فظيعة ماشي 

اوففففف خلصونا 

ذهب مرسي لميدان التحرير الخطاب عاجبني بصراحة الواحد ما بنكرش 

بس تعليقات من نوعية الحرس الجمهوري في حماية الرئيس محتاجة نهر النيل كله عشان ابلعها 

تاني يوم جردل مياه ساقعة ادلق عليا راح يحلف في المحكمة الدستورية 

ماشي مغصوبة يا ناس مغصوبة و حلف مرة كمان في وجود مجموعة غريبة من الناس كوكتيل كدا بس اوكيه مش مشكلة 

(المشكلة رقم 1 بالنسبة ليا ...ليه قولت اعتصام لرفض الاعلان الدستوري المكمل و بعدين روحت حلفت عادي زي ما الاعلان المكمل قايل مش ضد ان الواحد يعمل اي حاجة بس ضد ان اقول حاجة و مالتزمش بيها )

و بعد كدا اختفي مرسي 

طلع العلاوة 15% و خلع ( علي فكرة مش جديدة انها تكون 15% هي جديدة للمعاشات سبق اقرارها في الميزانية الي قبل دي و اتلغت نظرا لعجز الموازنة )

فين مرسي لا حس و لا خبر 

راح خرج دفعة الدفااع الجوي و خلاص 

حاجة برتكولية كدا

فين يا عم الحاج الفريق الرئاسي و الحكومة الجديدة 

ما فيش 

فين الانجازات 

مافيش في برنامج مرسي ميتر الايام بتجري و الانجازات واقفة 

النهاردة بقي مشكلة بين ضباط قسم مدين نصر و محامين تصريحات هباب لوزير الداخلية 

و مرسي واقف كدا بيتفرج

وزارة الداخلية بتحشد عند قسم مدينة نصر و مرسي ساكت 

يبقي ننتقد و لا ماننتقدش 

يجيلك بقي واحد يقولك اصله لسه ماسك ساعدوه 

اساعده اني التزم بالقانون اتطوع في مشاريع تبع الحكومة اوكيه

انما بقي نكنس الشارع و ننظم المرور لا معلش مش شغلتي دي شغلة الحكومة مش شغلتي 

لما انا انزل اكنس اومال الحي بينيل ايه مش حعمل شغل غيري بياخد عليه فلوس و هو يانتخ  مرميش زبالة في الشارع ماشي غير كدا اسفة 

مش حنظم المرور عشان فيه ظابط مرور بيلبس نظارة شمس و يرغي في التليفون طول النهار انا اعمل شغله ليه

لما يبقي فيه تطوع للشباب يساعدوا الشرطة اوكية الي عاوز يتطوع يتطوع

انما اعمل حاجة من نفسي كدا مش في اطار مشروع  ده يبقي اسمه هرجلة 

الانتقاد للرئيس عشان قبل ا يعمل المصيبة 

ما عينش حد لحد دلوقتي لما يتهاجم حيعين و المرة الي جاية مش حيانتخ و حيعمل خطة 

انما نطبطب و ندلع  يبقي مش حنخلص 

انتقاد الرئيس عشان نوصل للافضل و الاحسن مش داخلين خناقة معاه يعني 

و انت يا عم مرسي خف و انجز شوية مش معقول كدا 

حاجات مالهاش علاقة ببعض

• المجلس بيستهبل يا فوزية ...بصراحة مش المجلس بس الي بيستهبل احنا كمان بنستهبل بنستهبل عشان ماحولناش بجدية كفاية اننا نتوحد ريحنا و قولنا الكلام بتاع مواضيع التعبير عن الشعب الواعي الي بيفرز و يحدد عن كفاح الجماهير و حاجات كده مجعلصة مالهاش لازمة استهبلنا عشان كنا فاكرين شفيق نازل يتسلي و هيتهزم و الاعادة حتبقي بين حمدين و ابو الفتوح او حتي ممكن تكون مرسي و اي حد فيهم ...من الاخر عمالنا خبراء استراتيجين و طلعنا في الاخر كفتة 

• shallow دي الكلمة الي بترن في دماغي لما اسمع حد بيدافع عن احمد شفيق و بيشتم في الاخوان بيتكلموا عن انجازات وهمية غريبة ما سمعتش عنها مطار حد ادني و اقصي للاجور و لما تقولوهم انه مرجعش الامن يقولولك ده مقعدش غير شهر ابصلهم كدا و ابلم و الاقيني بقولهم shallow

• مكسوفين يقولوا انهم حينتخبوا شفيق عشان مش بيحبوا الاخوان ..في ساعات المواقف الرمادية بتموتني و تنقطني بس استغربت الكسوف الي هما فيه اصدقائي المكسوفين مادام مكسوفين اوي كدا حتنتخبوه ليه  مش فاهماكم بصراحة

• يعني الكبار عاشوا تجربتهم الفاشلة خلال 30 سنة و معرفوش يعملوا حاجة و كان شعارهم من خاف سلم دلوقتي مش عاوزينا نكمل و نخوض تجربتنا  ايوة حنتخب الاخوان من حقي اجرب و اخسر بمزاجي مش زيكم قاعدين تنظروا علينا كفاية حرام بقي سيبونا انا مالي انكم كنتم بتنضربوا علي قفاكم من الاخوان في التمانينات كنتم عبط و هبل سيبوني بقي اجرب عبط مختلف عنكم 

• بكره البرادعي....ايوة حقيقة بكره كنموذج للراجل الانتوخ الي عاوز كل حاجة تجيله جاهزة هو راجل مشمئنط بشدة يطلع علينا عشان يقولنا افكاره اللولبية و يمشي ماشي افكارك دي هايلة و تحفة مش مشكلة بس الحمد لله ان مش كل الناس زيك و في ناس بتتحرك عشان تعمل التغير الي حضرتك مستنيه في سبب تاني لكراهيتي للبرادعي حالة الوله الي الناس فيها ناحيته البرادعي اول من قال كلمة تغير طب بالنسبة لكفاية و المدونين الي كانوا بيتسحلوا من قبل ما الاخ يظهر اصلا  نادي القضاة ...التعديلات الدستورية.....اضراب 6 ابريل ...سلم نقابة الصحفيين الي داب من كتر الوقفات الاحتجاجية الناس دي اشتغلت قبل ما الرجل المشمئنط يوصل اصلا 

• في لمحة شريرة مني مش حيشيل حد من الفيس عندي عشان بيدافع عن احمد شفيق عشان عارفة و متاكدة ان لما مرسي يكسب حيشتموني اني بنتقد مرسي و يقولولي ده اول رئيس منتخب و حستني جملة اعتبره ابوك يا اخي :)) علي فكرة عندي يقين انهم حيعملوا كدا 

المتشائمون

و الله الناس دي عجيبة جدا

العالم المتشائمة دول بتوع مافيش فايدة واصلها باضت 

و الثورة دي فشلت خلاص

و عمرو موسي حيكسب تاعبين نفسكم ليه

بصراحة الناس دي بتصعب عليا

هو ازاي الواحد ممكن يعيش و هو جواه كل كمية الاحباط و الفشل دي  

يعني هو بيصحي الصبح يقول اوووف مافيش فايدة الدنيا باظت 

و يروح شغله و هو عارف ان مافيش فايدة و يعمل كل حاجة و هو عارف ان مافيش امل

و المصيبة ان عندهم عيال طب بتربوا عيالكم علي ايه ان ما فيش فايدة انتم جيتوا ليه الدنيا وحشة 

الظريف انهم مش كفايه انهم محبطين لا و كمان بيحبطوا الي حواليهم

و الله الناس دي بتصعب عليا 

هو عايش و عارف ان مافيش فايدة  و مش عارف يستمتع بحياته  اه و الله 

يعني تلاقيه كده دايما مش طايق نفسه  و ضارب بوز و لو بنت تلاقيها طول الوقت تقولك مافيش فايدة مش حتجوز و لو اتجوزت اخلف ليه 

طب يا جماعة الخير انتم عايشين ليه

طب انا ساعات كده و ساعات كده 

بس اهو بزق في الدنيا و الدنيا تزق فيا

انا بكتب الكلام ده عشان المتشائمين في البلد دي كتروا اوي و مش فاهمة هما ليه كده

كلمة اخيرة ارحما الي جايبينا :)

و عشان اغيظكم اكتر 

عمرو موسي مش حيكسب  

جلال عامر :(

جلال عامر

حد عارف يعني ايه تشوف شخص تحبه 

حد كده جميل رقيق صافي زي سماء القاهرة بعد التنحي 

لما تشوفه تحس قد ايه اسكندرية جميلة 

لما بشوفه و اسمعه افتكر مسجد سيدي ياقوت العرش في بحري بفتكر الافراح الي في المرسي ابو العباس
جلال عامر هو شارع صلاح الدين و السبع بنات و شارع فرنسا
فيه صفاء نفس
جميل و رقيق و قوي معرفش ازاي بس بجد 

هو ده جلال عامر
بالنسبة ليا علي الاقل
اكتر حاجة مزعلاني في وفاة جلال عامر ان اخر حاجة شافها كانت مظاهرة لتوفيق عكاشة بتشتبك مع مظاهرة ضد المجلس العسكري
فيه صورة ليه علي النت
نظرته في الصورة
بتقول يا خسارة
معرفش علي ايه بس النظرة دي وجعاني اوي ايه ده
يا خسارة
بس احنا خسارتنا فيك كبيرة اوي يا عم جلال كبيرة اوي
ربنا يرحمك و يجعل مثواك الجنة و يجمعنا بيك في جنته ان شاء الله

28 يناير الذكري الاولي .....الم و اكتئاب

النهاردة 28 يناير 2012 مريت  سنة علي اول ايام الثورة و اعنفها
 بقوم الصبح و ابص علي الموبايل النهاردة علامة الاوف لاين بمزاجي مش بمزاج حد تاني
ببص علي اللاب الي علي الارض عارفة اني اقدر ادخل علي النت بسهولة من سنة ما كانش الحال كده
النهاردة السبت اول يوم عمل في الاسبوع و لازم ارجع القاهرة
انزل العربية مش عاوزة تدور حتي العربية اوف اوف
حالة من الخنقة الغربية شوية و دارت العربية
ماكنتش عاوزة اروح الشغل
ازاي يعني نروح الشغل النهاردة هما مش فاكرين النهاردة كان ايه
حالة من الكأبة حتي السما الصبح مغيمة الشمس مطلعتش
اول ما وصلت القاهرة فتحت الموبايل و كلمت امي انا وصلت مكالمة لا تتعدي دقيقة لكن ضرورية لو ماكنتش كلمتها كانت حتموت من القلق و خصوصا لو اتصلت و لقيت الموبايل مقفول
الا لعنة الله علي الظالمين
الالعنة الله علي الكافرين
امي كانت مش عارفة تتطمن علي عمر و بابا كان في الكلية
في اسكندرية كان طلبة حقوق بيمتحنوا يوم جمعة الغضب هستريا الشارع الامتحان يخلص الساعة 7 الحظر الساعة 6
صريخ صريخ نار في كل مكان التلفزيون اتجن و كل ده و مافيش تليفونات بتعتمد علي حظك ووقفتك في البلكونة المحاولات الفاشلة للبحث في الشارع اكتشافك انك مت تعرفش الرقم الارضي لاي حد المحمول اكل حياتنا
الذاكرة بتخدعك و ترجع احداث اليوم
تلاقي دموعك بتنزل
"
28 يناير 2011- الساعة 9 صباحا بقوم من السرير لسه راجعة من القاهرة امبارح و اول ماوصلت ما كانش فيه فيس بوك الدخول بالبروكسي و بعد كده ضلمه
اخر حاجة فاكراها من امبارح ان في حد كلمني بالتليفون هو مش حد هما ناس كتير لازم ننزل بكرة هما بيعاملونا كده ليه احنا مش كلاب
امي اعلنت حالة الطوارئ في البيت ... جابت اخويا و مراته يتغدو عندنا نوع من الاطمئنان و قالت مافيش نزول ....عمر بيخترع  حجة للنزول
بعد الفطار عاوزين حاجات من السوق و عاوزة فلوس من البنك
عارفة ال ATM الي عند القيادة هاتي منها مش لازم تروحي لرشدي
بنزل الشارع تقريبا شبه ساكت بطلع علي الشارع الرئيسي شارع المشير طرف عربية الامن المركزي باينة بكمل لحد ماوصل للقيادة امن مركزي مالي الشارع 
الضباط ببدلهم قاعدين يشربو شاي و العساكر بيفطروا و معاهم ناس لابسة مدني قاعدة معاهم مش محتاجة اعرف دول وظيفتهم ايه
شحنة كره ضدهم
بعدي الشارع و اوصل لماكنة البنك حاسة بعيونهم في ظهري
باخد الفلوس و امشي في اتجاه السوق
(لحد النهاردة مش عارفة ازاي الماكنة دي كانت شغالة مع ان ساعتها كل المكن كان واقع علي فكرة فضلت شغالة لحد ما الفلوس خلصت بعد يومين)
بشتري الحاجات و ارجع تاني
السوق ساكت و القهوة فاضية
اشتريت كارت شحن و انا بشتريه الراجل قالي مالوش لازمة الشبكة واقعة رديت عليه و قولتله ساعتين و ترجع رد عليا و قالي مش باين
رجعت البيت كانت الساعة بقيت 11 عمر كان الف فيلم و اخرجه و فاضل بس يمثله
حاجة بسيطة  قبل صلاة الجمعة سلاموا عليكم ما تتأخرش حاضر
قبل ما ينزل سابلي رقم و قالي ده رقم مكان لو الدنيا باضت اوي حيعد فيه
و هو نازل بقاوم الافكار انه ممكن مايرجعش بقاوم السواد الي جوه دماغي

اذان الجمعة
اول مرة اسمع الاذان كده ...حسيت انه قد قضي الامر خلاص مافيش رجوع كله في الشارع و الاذان هو صفارة البداية
قضي الامر
الجامع تحت البيت فاضي
مافيهمش غير المخبريين
السلام عليكم و رحمة الله السلام عليكم و رحمة الله

الشعب يريد اسقاط النظام ..عمر قالي ان عند جامع ابراهيم اول واحد هتف كان جوة الجامع

الشعب يريد اسقاط النظام
 المحافظة وقعت
الاقسام اتحرقت و الاحياء
عربية الجيش بتلف في الشارع الساعة 4
علي الساعة 4.30 سمعت عن حظر التجول
اخو اميرة رجع بعد ما تقبض عليه  عند بيت خالد سعيد و اول ما وصلوا قسم الرمل الضابط مشاهم وقالهم روحوا
عمر لسه مرجعش
افكارك السودة تتالق و البلكونة مش بتسعف عم رجب قفل بسرعة و جري
تدخل الشقة  الجزيرة بتفرحك اسكندرية فيها وفيات وهمية الصورة
بشعة اخويا تحت
الباب بيخبط عمر وصل
هدومه كلها مبلولة  شايل كيس فيه بيبسي و عنيه حمرا جدا و صوته رايح
يغير هدومه و ينام

الساعة بقيت 7 و شوية 8 و التلفزيون يعلن ان بعد قليل الرئيس يلقي بيانا عاجل للامة

الساعة 11 ماما دخلت نامت و هي بتلعن الحيوان الي لطعنا لحد دلوقتي
الساعة 12 مساء يطلع علينا العن وجه ممكن تشوفه وجه كرهته
و بعد لك لك لك ساقيل الحكومة
صريخ عمر و هو بيقول لا صوته مش طالع الناس ممامتتش عشان تغير نظيف  بابا مش مصدق و كل الي نازل عليه حسبي الله و نعم الوكيل

احباط
بحط دماغي علي المخدة  و انام و مش عارفة بكرة فيه ايه لا فيه موبايل و لا نت و لا شغل و لا اي حاجة استرها يا رب  
سلام
"

انا عارفة ان كل واحد فينا مر بتجربة في اليوم ده
كل الي بفكر فيه معاناتنا كبشر من قلق و خوف و بكاء راحت  و دلوقتي بنتكلم عن كلام فارغ
انا محدش من عيلتي حصلوا حاجة
بس فيه ناس تانية ولادها ماتت و فيه ناس ولادهم رجعوا تاني يوم  و فيه ناس ولادها مرجعتش
يا تري حرقة قلب اب او ام  في اليوم ده تسوي كام
واثقة اني حاخد حقي من حسني و كل من باعنا و قبض فينا الثمن
الاصل ان افعل ما شئت فا كما تدين تدان


لن ننسي شهدائنا لن ننساهم
الله يرحمهم و يسكنهم فسيح جناته

هو بكرة جاي فيه ايه؟

امبارح 25 يناير 2012 كنت سعيدة بطريقة هسترية  مبسوطة جدا
يمكن عشان اليوم عدي علي خير او عشان الاختلافات الي احنا عايشينها دابت في وقت المسيرة لتعود للهدف الرئيسي الي هو يسقط يسقط حكم العسكر
اختلاف الطريقة هو المزعج
بيوصل لتبادل اتهامات و عنجهية و عوجان
ببساطة
كل واحد شايف انه مستهدف و الاخر عاوز يورطه ليقضي عليه
هو ده ملخص الي في دماغ كل الاطراف
النهاردة بقة 26 يناير 2012 مش طايقة نفسي قلقانة جدا و متعصبة و النقاش الي ممكن اخوض فيه بالامس عشان افهم حد او اشرحله النهاردة مش طايقاها و لا مستحملاها
ببص لاهالي الشهدا و المصابين بعد مرور سنة و الاقي مافيش حاجة
يا تري بعد 10 او 15 سنة حيبقي فيه حاجة عدلة
و لا حنفاجأ بيوم كده مذيع او مذيعة في برنامج مستقبلي جايب واحد من المصابين الي مش لاقي شغل و بيمر بظروف صعبة
و لا عن ابناء الشهداء الي بقوا بيلعنوا الدنيا و  ما فيها
و اكيد بيلعنوا البلد الي اخدت عائلهم و تركتهم بدون اي شيئ غير المرارة و الحزن
مجرد فكرة بتخليني اتعصب و اكتئب
علي فكرة انا مش قلقانة علي مستوي معيشة افضل لان ده في ايد ربنا سبحانه و تعالي انما قالقني ان دايرة القتل لسه مستمرة لازم الي قتل يتحاسب لازم
عشان الي يجي بعده ما يقتلش الدايرة لازم تقف
المشكلة ان الدايرة مستمرة و اصبحت اكثر شراهة بتقتل كل يوم  حد جديد و لو اتسابت حتقتل اكتر
القتل كل يوم بيخطأك اموت في حد ذاته راحة المشكلة ان الي بيموت حد تعرفه حد عزيز
يا تري حنفضل علي نفس الوضع المنيل الي احنا فيه
ربنا يستر  ربنا يستر ربنا يستر

قصيدة و عاجباني

منصورة يا مصر مش بجميلة العسكر
إحنا اللى روَّحنا بدرى بس مش أكتر
قول للى روَّح عشان يرتاح فما ارتاحشى
الراحة كلِّ ما تستعجلها تِتْأخَّر
واللى ها ينزل ها يُحكُم لو ما روَّحشى
قصر الرياسة بْبلاش، بسِّ انتَ مستخسر

●●●

قصر الرياسة ما فيش بينك وبينه كتير
فيه سلك شائك وكيس رملة وكُشْكِ غفير
لو جيت لوحدك، ها يضرب، والرقاب ها تطير
وان رحت مليون، ها يهرب، وانتَ تبقى أمير
رئيسنا واحد شهيد، يحكُم من التحرير
قصر الرياسة الجديد بِصينِيَّة ومدوَّر

●●●

منصورة يا مصر بجميلة خيام الخيش
يحرقوها عشان تمشى ولا تمشيش
يا مصر عُمْرِ ما فيه ثورة تقوم بِشْوِيش
المُلك ده اللى ادِّتيه للعسكرى بقشيش
حقّ العيال اللى ماتوا فى طابور العيش
وبنت عَرّوها فى الشارع وشيخ أزهر

●●●

يا حاجّة ياللى بتقرى الكفّ والفناجيل
إقرى وشوش البشر، ع النصر تلقى دليل
ده حقنا ف مصر مش ها نسيبه للتساهيل
وان قلتى نصبر يومين، يبقى ها نصبر جيل
أجلنا قبل كدة فادنا بإيه التأجيل
رَمْيِ الجُثَثْ فى الزبالة فى الضُّحَى الأحمر

●●●

منصورة يا مصر بجميلة ولاد وبنات
بجميلة اللى انحبس بجميلة اللى مات
بجميلة التريَقَة والضحك فى الأَزَمات
ودم فوق الرصيف ناقش سُوَر وآيات
يا مصر ياللى انتصرتى فْ جُمعِتين وِتَلات
نفس العَدُو هُوَّه هُوَّه بَسِّ متنكَّر

●●●

الصبح طالع لِقِى دبابة فوق راسُه
مربَّعة فوق دماغُه وكاتمة أنفاسُه
والشرق مقفول وخِتْمِ النِّسر ترباسُه
قام خبَّا شمسُه ووزَّعها على ناسُه
على العيال اللى ماتوا غدر وانداسوا
بقى شرق فى كل جسم، وشمس بتنوَّر

●●●

الشعب واقف وصدره للرصاص عريان
والدولة خايفة ولافَّة نفسها ف جدران
وزى ما الحاوى ممكن يلدغُه التعبان
شوفوا حيطان السجون بتلفّ ع السجان
والفالح اللى بيتهوَّر على النسوان
ما شفناهوش ع الحدود يا ناس بيتهوَّر

●●●

كان للفراعنة إله قرد وإله تمساح
وللإله كهنة وعسكر يقف بسلاح
وخزنة متقفِّلة بالضبة والمفتاح
وقصر يشبه قصور الجمهورية براح
يا عينى ع الآلهة بقوا فرجة للسياح
ياللى بنسر وسيفين فرحان ومتكبَّر

●●●

الشمس تُدعى الغزالة فى اللغة فاعلم
وبالغزالة المضيئة فى السما باحلم
غزالة ممكن تبيِّن طبعها الوحشي
ما تغرّكمش الأسامى ورقِّة المبسم
دى شمس واللى يِقَيِّدها ما يفلحشي
ومصر حالفة، ها تتحرر، هاتتحرر

تميم البرغوثي

تسليم السلطة لمين ؟

مر عام بالتمام و الكمال علي الثورة
ايوة سنة بحالها
احنا دلوقتي في 2012
طب ايه الي حصل من بعد الثورة
ببساطة و لا حاجة
عندنا رئيس لا
طب الاقتصاد اتحسن ...لا
حد اقصي و ادني للاجور ....لا
اكيد بقه الداخلية اتطهرت....لا
يبقي عملنا حملة محاسبة و تطهير واسعة للجهاز الاداري للدولة ...لا
حققنا العدالة الاجتماعية ...بردوا لا
احنا في سنة طويلة عريضة عملنا حاجة واحدة بس انتزعنا  انتخابات مجلس شعب بعد سلسلة طويلة من الاعتصامات و المظاهرات و الك و العجن الحمد لله عملنا انتخابات لمجلس الشعب
طب و المجلس ده حنعمل بيه ايه؟؟؟؟
عاوزين نعمل دستور و ننتخب رئيس
بس عندنا مشكلة صغيرة  اسمها المجلس العسكري
ببساطة المجلس العسكري في كل خطوة بينهك كل الموجودين علي ارض مصر من اصغر واحد لاكبر واحد
ده عشان يحدد معاد انتخابات مجلس الشعب كان كل المصريين قربو يفرفروا
و في كل مرحلة  كان فيه مصيبة شكل
و تصاحب كل ده العزف الجماعي من وسائل اعلام و مواطنين شرفاء للحن الوحيد الي تملكه السلطة في مصر من ايام مينا موحد القطرين مصر تحترق منكم لله خربتوا البلد و مصر مستهدفة و الخ الخ الخ
و نغرق في جدال عميق  كلنا عارفينه بقالنا سنة غارقانين فيه
يعني ان شاء الله عشان نعمل دستور و ننتخب رئيس قبل 2053 لازم المجلس يسلم السلطة
بس هو مش حيسلمها غير لسلطة مدنية منتخبة
طبعا في ناس حتقول المجلس قال انتخابات الرئاسة في شهر يونيو القادم
اه بس مقالوش يونيو سنة كام
يبقي المجلس العسكري لازم يسلم السلطة
تاهت و لقيناها
نسلمها لرئيس او لمجلس شعب
حلو موضوع رئيس ده
طب ننتخب رئيس مش قصة يعني احنا بقنا خبرة دلوقتي في الانتخابات
بس عندنا مشكلة اولها الرئيس الي حننتخبه ده صلاحياته ايه  هو احنا صحيح في الاستفتاء قررنا كل حاجة في الرئيس حتي جنسية ام سيادته بس نسينا حاجة مهمة جدا
الرئيس ده حيعمل ايه؟؟؟؟
طب نمشيها دستور واحد و سبعين
الدستور ده من الاخر فكس و معدش ليه لزمة اصل المجلس العسكري عطل العمل باعماله و عمل اعلان دستوري كده ما جبش فيه سيرة صلاحيات الرئيس
و حتي لو دستور 71 شغال حنجيب رئيس نمسكه كل حاجة شرطة و جيش و قضاء و محلي و فاضل نديه المرتب و يصرف علينا
و احنا ما شاء الله حزب الاغلبية عندنا هو حزب النفاق الوطني ناس كده كرست نفسها لخدمة الجالس علي كرسي الحكم 
يعني المتحولون بكرة الصبح حيلعنوا المجلس العسكري و يمجدوا الرئيس الجديد 

طيب ايه الحل 
نعمل دستور .... المجلس العسكري موجود و دول عاوزين دستور تفصيل يخليهم ولاد البطة البيضة 

البديل و هو بصراحة مش البديل السوبر و لا  احلي حاجة في الدنيا هو حل توافقي
الورطة السودة دي حلها المتاح هو  تسليم السلطة لمجلس الشعب
اشمعنه مجلس الشعب
يعني مجلس الشعب هو سلطة مدنية منتخبة 
تستوفي شروط المجلس العسكري الخزعبلية 
و هما 425 عضو باين  صعب تقعد تنافقهم كلهم 
هما من تيارات مختلفة بيختلفوا في حاجات و يتفقوا في حاجات تانية 
ما فيش فيهم اتنين بينهم بيحبوا بعض علي طول الخط حتي جوة التيار الواحد
مش حيعرفوا ياخدوا قرار الا بنسبة 51% و دي عشان يوصلولها لازم تكون في حالة اجماع مجتمعي فيها الحد الادني

و بعدين الناس دي حتكون مهمتهم انهم ينتخبوا رئيس مؤقت تحت اشرافهم لادارة شئون البلاد
و نعمل دستور دون سيطرة المجلس العسكري
طبعا نحط شرط رزل و غلس ان حضرة الرئيس المؤقت ده مالوش حق يترشح في الانتخابات الرئاسية التالية 
انا شايفة كده معقول بنسبة 80%
ممكن شايفاها كدة من وجهة نظري
يمكن في حاجة تانية احسن
المهم ان السلطة تتسلم

نشوفكم علي خير في 25 يناير 2012