حرقة دم

مش عارفة نسمي الي بيحصل ده ايه
حالة غريبة من البلادة في كل شيئ حولك كل واحد
النهاردة اصبت بحالة من اليأس
هو احنا وصلنا كده ازاي
ايوة وصلنا كده ازاي ؟
ازاي وصلنا ان نستجدي مشاعر الناس لهذه الدرجة
ايوة بنستجدي  لما نعرض فيديوهات علي اصحابنا و نقولهم شوفوه العسكر بيعملوه ايه
شوف ازاي بيضربوا الناس و يسحلوهم
بص علي البنت حصلها ايه
و تقعد تجري وراهم عشان توريهم الصور
تعمل شير للصور علي صفحتك علي الفيس بوك و تفاجئ تاني يوم بالي يقولك ايه الي انت حطه ده
تتلقي التعليقات  و الي يعملك شير لفيديو او صورة او تعليق من صفحة احنا اسفين يا هباب  عشان يثبت انك غلط و مضحوك عليك

و الي يقولك كتاب وصف مصر  اتحرق تقعد تقوله  الناس ماتت  و الشيخ عماد اتوفي  و علاء طالب الطب شهيد و في الاخر يقولك خرائط مصر الاصلية مش حنعرف نثبت حدود مصر ( ده علي اساس ان مصر حتة ارض و الخرائط دي الحجة بتاعتها و المجلس محتاج الخرايط عشان يعرف يبيعها) ترد و تقول الانسان اهم ده في حديث معناه ان حياة الانسان اهم من هدم الكعبة

طول الوقت حرق دم .... عن حنعمل ايه ؟ البلد بتوقع هما بتوع التحرير دول عاوزين ايه
اصل معرفش مين مش عارف يروح يختم ورقة ايه من معرفش فين بيلوموا الثوار و مش قادرين يلوموا الدولة لي خليت حياتهم متعلقة بختم
الشخص الابدي الي عاوز يخلص اي حاجة من مكان ما دايما جنب الاحداث

اي هرتلة فاضية  و خلاص
وفي ناس هدفهم الاسمي انهم يحرقوا دمك

النهاردة قررت حاجة واحدة : مش حستجدي حد تاني مش حدخل في نقاش مع اي حد همه انه ياكل و يشرب و ينام ؟
اي حد مش شايف انه يستاهل احسن من كده مش عاوزة اعرفه
انا شايفة البلد حتكون احسن و افضل 
دي سنة ربنا في الارض 
بعد عصر الاضمحلال بيجي عصر ازدهار 
كل المجلس بيعمله حيتحاسب عليه و حيدفع ثمنه
الاصل انه كما تدين تدان و كل واحد بيتحاسب علي مقدار افعاله بالضبط
حيجي يوم في مصر تكون فيه حياة المواطن اهم من الحكومة و الدولة و اهم من المجمع العلمي

اسكندرية 
21-12-2011

محمد محمود.... حياتك اتغيرت

حياتي اتغيرت .... ايوة بقيت انسانة تانية مختلفة
بتعرف علي نفسي من جديد
ساعات بفكر اني كنت بخاف من حاجات كتير اوي دلوقتي خوفي بقي اقل بكتير  بكتير اوي
الاهم اني ما بقتش اعيط خالص
تقريبا عندي مخزون من الدموع خلصتوا هناك ماعدش فيه دموع نهائي
انا ما كنتش في الصفوف الاولي
انا كنت في المستشفي الميداني لمدة يومين
شوفت 2 ماتوا فجأة مافيش نبض او حركة او احساس
عدد الناس الي عايشة  قل واحد
و اتحول لسطر في خبر
بيدور في دماغي سؤال واحد انا لو مت حدفن فين ؟
اول حاجة عملتها لما رجعت اسكندرية اني زورت مقابر عائلتي في المنارة 
عاوزة  اشوف المكان الي حدفن فيه
المشكلة اني بعمل كده بثبات شديد
في حاجة مكسورة مش عارفة مكانها
بتعرف علي نفسي فعلا
بس اللحظة الي حصل فيها كل ده محفورة في دماغي بكل تفاصيلها  كل حاجة
التفاصيل مخي بيسترجعها كل يوم كل يوم كأنه عاوز يفكرني اوعي تنسي
لما الذكريات ترجع تاني  بحس اني عاوزة اعيط بس ما فيش دموع
مش بعيط خالص
بقرا الكلام عن محمد محمود و مش بحس بحاجة
لما اسمع اي حد بيتكلم عن محمد محمود بصرخ فيه بصرخ بالمعني الحرفي للكلمة
صريخ صريخ صريخ
و ساعتها بفكر هو الانسان مالوش قيمة للدرجة دي
بكره العسكر اكتر من  الاول بكتير
بكره الي بيعملوه فينا
و مش عارفة ليه  بيعملوا كده
عشان كرسي حقير اومال لو كانو فيهم نفس شوية كانوا عملوا ايه

الدعاية الانتخابية - عالم يفط يفط !!!!!

طريقة الدعاية الانتخابية الي ماشية دلوقتي بتدل علي شيئ واحد ان الثورة لسه مواصلتش للدعاية الانتخابية
الدعاية تقريبا تقليدية جدا
اليفط تقليدية الافكار تقليدية و الشعارات تقليدية

يعني فيه ناس سبحان الله نسيت ان شعار فكر جديد هو شعار مؤتمرات الحزب الوطني  و شغال كتابة ليه علي دعاية 2011 بعد الثورة و بعد حل الحزب الوطني

بس بصراحة الحق يتقال كتب مستقبل جديد  طب ده انا انتخبه ازاي

سيبك بقه من تهاني المرشحين بعيد الاضحي المبارك كأن الناخبين مستنيين التهاني دي عشان نعرف ان العيد جه

 سيبكم بقه من انفجار اليفط الي حاصل في اسكندرية مش ممكن 
ما فيش شارع الا و فيه يفطة عموايد النور كلها تم احتلالها بيفط السادة المرشحين

  شارع ابوقير يفط يفط يفط

 اليفط فوق بعض  ماعادش فيه مكان خلاص

تفتكرا انا كناخبة ببص علي اليفط دي اصلا 

و لا ليها اي قيمة 

طبعا كلاسيكيات الانتخابات المصرية لسة موجودة تدي الناخب اي حاجة

من مبدأ ان مافيش حاجة ببلاش  

و طبعا احنا في يومين مفترجين ايه المانع اننا نوزع هدايا علي الناخبين بمناسبة العيد

مش فارقة اذا كنت قاءمة لحزب او فردي

طبعا مش حننسي ان فلان يؤيد و يبايع فلانعلي طريقة فتحي ينعي فلان و يصلح الساعات

 معرفش مين الي فهمهم ان مجلس الشعب بالبيعة بالانتخاب علي فكرة

فين البرامج الانتخابية

مش عارفة مين الي فهم الناس دي ان حد ممكن ينتخب واحد شاف يفطته متعلقة في الشارع لا و كمان عامل بيها زحمة

مين فهمهم اني حنتخب حد عشان فلان و ا علان بيؤيده و يبايعه

طبعا فيه ناس قليلة جدا بتوزع برامج انتخابية و يفطها قليلة

دول انا بحترمهم

انا مستنية البرامج بعد العيد يمكن ربنا يخلف ظني

الانتخابات و اللحمة

يا تري من حق المرشح انه يوزع لحمة علي الناخبين او اي سلعة لاستمالتهم في اتجاهه؟
سؤال مهم جدا
مصر بعد الثورة داخلة علي انتخابات مجلسي الشعب و الشوري الي الواحد عنده امل كبير انهم يخلصونا من الوحلة السوداء الي احنا فيها مع المجلس العسكري
طيب جميل يعني الانتخابات مهمة مصيرية و فيها فئات و شرايح جديدة حتنتخب لاول مرة
في بعض المرشحين سواء للفردي او للقوائم تبنوا انهم يساعدوا الناس من خلال معارض خيرية للسلع قوافل طبية و اهم حاجة مهرجان اللحمة الي احنا عايشين فيه
اولا انا مش ضد المعارض دي نهائيا  بالعكس دي نوع من المساعدات الخدمية الي بتقدمها الاحزاب لمواطنين الدوير بتاعتها
بس السؤال دلوقتي هل ينفع نقدم نفس الخدمات دي  في فترة الانتخابات ؟؟؟

طب نرجع كده بالذاكرة شوية لورا في العيد الصغير و دخول المدارس و رمضان و غيرها من المناسبات الاجتماعية الي مرت علينا و الي كانت معظم الاحزاب و الافراد دول موجودين خلالها
هل كان فيه نفس النشاط الخدمي الي موجود دلوقتي
الاجابة للاسف لا
طب تفتكروا ليه؟؟؟؟
عشان لما المناسبات دي عدت علينا موضوع الانتخابات ماكنش واضح ومطروح زي دلوقتي بل وقتها كان فيه كلام عن تأجيل الانتخابات لمدة عام اخر
انما العيد ده باب الانتخابات اتفتح و احنا في فترة دعاية انتخابية
يبقي ايه؟؟؟
يبقي الي بيحصل ده دعاية انتخابية مش خدمات دورية خالص

انا رافضة الطريقة دي في الدعاية
بصراحة شايفاها رشوة لان وراها غرض واضح " انا بديك السلعة دي عشان تديني صوتك "

الغريب اننا كنا متفقين علي الكلام ده لما كان الحزب الوطني بيقوم بيها دلوقتي في ناس شايفاها دعم للمجتمع
ماشي انا احترم رأيهم تماما
المحك الوحيد لاثبات غلط كلامي و صحة كلامهم ان يكون فيه برنامج انتخابي محترم
و البرنامج الانتخابي ده مختلف تماما عن برنامج الحزب
البرنامج الانتخابي انا كمواطن غلبان متوقعة فيه ان المرشح او القايمة تقولي حتنفذ برنامج الحزب ازاي
ماهو الاحزاب كلها عندها برامج كويسة بما فيها الحزب الوطني انما محدش نفذ حاجة
الضمان بقه للتنفيذ حيكون صوتي في الانتخابات الي وراها
ببساطة ما نفذتش مش حنتخبك تاني
و بالمناسبة الانتخابات الي جاية قريبة جدا بعد وضع الدستور علي طول فبلاش تعملوا البحر طحينة عشان مافيش وقت نغمس الطحينة دي كلها

توزيع السلع و الرشاوي الانتخابية مش هو الحل
و علي فكرة الغلابة مش حيدوا صوتهم عشان اي حاجة وقتية  انما لحاجة مستمرة خلاص عهد بيع الاصوات مابقاش ينفع
و الناخبين المستريحين للاسف الطريقة دي بتفكرهم بالحزب الوطني
و التنويم في العسل ما بقاش بيأكل عيش
في اسئلة مهمة لازم تجوبوا عليها 
الامن: ازاي نرجع الامن و نعدل الشرطة
الاقتصاد: ازاي نخلي الحاجات ما تغلاش اكتر و ازاي نشتغل احنا مش لاقيين شغل
السياسة : مين الرئيس الي جاي احنا عاوزين نخلص
فربنا يعوض عليكم في الي صرفتوا
و ياريت تعملوا حملة انتخابية عدلة عشان انا عاوزة انتخب مش عاوزة ابطل صوتي

مواطنة مصرية
مش بتاخد رشوة انتخابية

الدعاية الانتخابية 1

من قبل ما الانتخابات تبتدي و اليفط شغالة سواء للدعاية لحزب او لشخص معين
بس مع بداية الحملة الانتخابية رسميا  الحنفية اتفتحت و شكلها مش حتقفل
فكرت هو الواحد ينفع يوثق الدعاية الانتخابية بكافة انواعها
و لان انا لوحدي فقررت ان اصور الي اقدر عليه و احطه هنا في المدونة
في حاجات غريبة و حاجات مستفزة
فيه حاجات صورتها و حاجات لسه حصورها شوفتها بالعربية و ماكانش فيه فرصة اني اصورها
طبعا مش محتاجة اني اقول ان الصور كلها تقريبا حتكون في منطقة سيدي جابر
لو قدرت احضر مؤتمرات انتخابية ححضر و اصورها فيديو لو ينفع
الصور دي اتخدت النهاردة 3 نوفمبر
في منطقة سيدي جابر طبعا
هو الموضوع بدأ امبارح لسه راجعة من القاهرة و اول ما دخلت شارع المشير و كان فيه انفجار في اليفط و الدعاية الانتخابية دعوات لصلاة العيد
حاجة كده تحسسك ان الشارع زحمة اصلا
مش ممكن
اول حاجة اخدت بالي منها ان حزب الحرية و العدالة بيعمل دعاية بكثافة شديدة سواء لمبادئ الحزب او للحزب نفسه و يرفع شعار كله مباح في الدعاية الانتخابية
اهم حاجة لفتت نظري ان مافيش سيرة خالص عن الاسماء الي نازلة في قوائم الحزب و لا حتي اسم القائمة
اداني احساس ان هما عاملين دعاية انتخابية عن الحزب مش هدفها الانتخابات مع ان فيه يفط مكتوب عليها انتخابات 2011
بصراحة الي حيحاول يعمل دعاية انتخابية او دعاية من اي نوع مش حيعرف لان خلاص مافيش مكان
و بالمناسبة النهاردة اول مؤتمر انتخابي لحزب الحرية و العدالة

 و دي المنصة الي عاملينها في مكان المؤتمر الانتخابي الاول

 طبعا احنا في يومين مفترجين و مافيش مانع ان يتم استغلال ده في الدعاية الانتخابية حتي لو بصورة غير مباشرة و علي فكرة طارق طلعت مصطفي عامل نفس الحاجة بس اليفط متعلقة في مكان بعيد عني

و من باب ان كله متاح في الدعاية الانتخابية

بس بصراحة الواحد يشهد ان رغم الدعاية المكثفة فهم مالزقوش اي حاجة علي الاعمدة بحيث يصعب ازالتها لا هما ربطوها بحبل في اي عمود  يعني بعد الانتخابات بساعة كل ده يتلم بسرعة

فيه حزب تاني اسمه الاصلاح و النهضة انا بصراحة مش عارفاه خالص بس ليه دعاية منتشرة عن مبادئ الحزب بقالها اسبوعين الي لفت نظري لدعاية الحزب ده انه تقريبا بيعملها عند نفس المصمم الي بيعمل لحزب الحرية و العدالة نفس الفكر تقريبا

نيجي بقه للمستقليين الدعاية ليهم ضعيفة جدا جدا  ومافيهاش اي ابتكار
مثلا المستشار الخضيري ليه دعاية بس تعتبر قليلة و تقريبا الي شوفتها كلها كانت في سموحة قدام النادي  و في دوران كليوباترا

 طبعا اي دعاية بيبقي فيها حاجات كده غريبة اغرب حاجة شوفتها كانت لمرشح علي مقاعد الفردي عمال اهم ما يميزها انها كانت بتقدمه علي انه مرشحكم الدكتور العامل معرفشش ازاي بصراحة كل ما شوف اليفط بتاعته اضحك و هو الوحيد الي حاطط الرمز بتاعه رمز الجرس
فيه واحد النهاردة ماشي في الشارع قالي اصله كان محضر اليفط عرف الرمز و الرقم  و علقها علي طول
لو حد عنده فكرة ازاي هو المرشح الدكتور العامل يبقي يقولي :)))

الحلم

بمناسبة ان قاعدة بسمع البرادعي و متغاضة جدا مش حاسة ان ده الرئيس و لا اي واحدمن المرشحين الي موجودين
مش دول الي حيحققوا الحلم

قريت نوت كنت كتابتاها علي الفيس بعد الثورة علي طول

اسمها سلاحنا كان احلامنا

" النهاردة قريت عن الثورة المضادة و العملاء و الانتهازين و الناس الوحشين
و السؤال الي بيشغل كل الناس مين الادمين ؟ مين وائل غنيم؟
و شوفت كمية فيديوهات كبيرة جدا عن كل حاجة
يااااااااااااااه هو كل الناس دي خاينة يا نهار ايبض كل الناس دي حرامية كل الناس دي منافقة
هو مين ممكن يكون رئيس مصر القادم؟ كمية اسماء تخلي الواحد يفكر ان فعلا اسهل حاجة ان كل مواطن يعلن نفسه رئيس جمهورية نفسه ونخلص بلا انتخابات بلا وجع قلب
وسمعت كمية اشاعات اكثر من الي سمعتها في حياتي  كلها
 جالي اكتئاب
 بس في الاخر افتكرت حاجة واحدة بس يوم 25 يناير باليل لما شوفت الي حصل في التحرير و في كل حته في مصر  كل الناس دي مكانتش موجودة بردوا مكنتش اعرف مين الادمن؟ و لا مين وائل ولا اي حاجة اصلا
 كل الي كنت اعرفه ان الاحلام و الامل ان بكرة احسن هو الي بقي موجود ولسه موجود
 مش عايزة اي حاجة وحشه حصلت لحد تحصل تاني
مش عايزة حد يبقي خايف
عايزة الفقير حتى لو فضل فقير يكون له الحد الأدنى من الكرامة و الإحتياجات الإنسانية
 عايزة إن إبني لما أخلفه في يوم من الأيام يتعلم صح، يتعالج صح، يبقى عنده أي أمل و طموح مهما كان
 عايزة اعيش و انا متاكدة ان بكرة احسن عاوزة حلمي مالوش حدود كل حاجة فيه ممكنة
وده لسه موجود و مافيش حاجة اثرت فيه ولا غيرته
يبقي كل الحاجات دي فعلا مش فارقة
لا فارق مين العملاء ولا مين عمل ايه ولا مين قال ايه و لا مين المستفزين الي بيقولوا احنا اسفين يا ريس
بجد انا سلاحي هو حلمي الي مش ممكن حاجة تغيره ابدا مهما اتغيرت الظروف و الاشخاص
انا فعلا عايزة أعيش بكرة أجمل وأحسن ليا ولكل الناس"
القاهرة 17 فبراير 2011

ده حلمي بصراحة ما تغيرش فيه حاجة و مش لاقية حد يساعدني اني احقق الحلم

تعمل ايه لو اتقبض عليك

البلوج ده جمعته من تويتات @NadimX و كمان @sabrykhaled عشان يكون اسهل
الفكرة فكرة @larynabil

اولا .. سجل ارقام الطوارئ دي عندك : مجموعة لا للمحاكمات العسكريه: - 0104118110- 0107821006...جبهة الدفاع : 0120624003 - 0163347782 #Sep30

ده بالاضافة للارقام التالية
لا للمحاكمات العسكريه القاهره 0102850271-0107821006،اسكندريه 0194874869
جبهة الدفاع عن متظاهرى مصر
القاهرة الكبري 0225758908 او 0120624003
الإسكندرية 0171638832
السويس 0127357093
طنطا 0124544946
... 0163347782

مركز النديم:
0100552793
0109552374

مركز هشام مبارك
0121519595

و ذلك في محاولة لحماية المتظاهرين من الاعتقالات و المحاكمات العسكرية

ثانيا: اتحرك من مسيره عددها كويس..لو العدد قليل اتحركو و ضموا على اقرب مسيره #Sep30

ثالثا: لو حصل اشتباكات ماتتسحبش ناحيتها الا لما تتأكد من اسبابها، ومين فيها #Sep30

رابعا: يا ريت ماتروحش ناحية اي اشتباكات الا وانتا مجهز ادوات حمايتك"خوذه-ماسك غاز-كولونيا-هدوم طويله "ا #Sep30

خامسا:لو داخل اشتباك،بلغ نمرك ونمر اهلك لكذا حد تثق فيهم #Sep30

سادسا:جهز رساله او تويته انه اتقبض عليك،حدد فيها المكان ومين معاك ومين اللي بيقبض عليك"جيش-شرطه-مدني"ا #Sep30

وفي الاخر دي كلها احتياطات تسهل علينا المتابعه..في كل الحالات ماتقلقش..دايما ف ناس وراك.. بالتوفيق ‎‏ ‏‎ #Sep30

لو اتفبض عليك فعلا

في حالة الإعتقال منصحش بالمقاومه عشان متفقدش جزء كبير من قوتك و تحملك لإنك ممسوك ممسوك بس حاول تعمل دوشه لو في الشارع عشان نلاقي شهود عيان

أهم شيء تعمله إنك تحافظ علي رأسك و تحاول تحميها من أي صدمات بإيدك و تحاول تلقط صور بعنيك عشان تفيد اللي يتمسك بعدك بشهادتك

يحق للمتهم أو المعتقل رفض اجراء اي تحقيقات لحن إستدعاء محاميه وله حرية قبول وعدم قبول اي محامي يفرض عليه ويجب اثبات ذلك

يحك له كمعتقل أو كمتهم ان تثبت كل التجاوزات التي صدرت من القائمين على القبض عليك كما يجب توجه الاتهامات لهم في التحقيق !

لا توقع على مالم تقرأه ولا تجيب على السؤال الذي لا تفهمه وقم بإنكار كل التهم المنسوبة اليك واسأل المحقق عن جميع التهم المنسوبة اليك تفصيلا

ربنا يحفظنا جميعا

الجمعة 30 -9 جمعة استرداد الثورة

صباح الخير
الساعة دلوقتي 10.30
النهاردة جمعة استرداد الثورة
الاخوان مش حيشاركوا كالعادة بس شباب الاخوان حيشارك
احتمال يكون فيه اعتصام
امبارح سمعت يسري فودة مع بلال فضل و علاء الاسواني ........رغم الاختلاف معاهم في حاجات كتير بس الي قالوه صح
يا تري المجلس عاوز يبقي مكانه فين بالوضع الحالي الي مزبلة التاريخ
اليوم لسه في اوله
كالعادة اليوم بدون حراسة و لا تامين
طب مادام مش مسئولين عن تأمين اي حاجة ما يسيبوا الحكم بقي و يرحمونا
التحذيرات بدأت علي تويتر  ربنا حيسترها انا متأكدة ان شاء الله خير كله خير
انا صحيت من الصبح بسمع في قصيدة الميدان لعبد الرحمن الابنودي جميلة اوي
بس فيه اجزاء عجبتني اكتر  زي:


" آن الآوان ترحلي يا دولة العواجيز عواجيز شداد مسعورين أكلوا بلادنا أكل.. ويشبهوا بعضهم نهم وخسة وشكل طلع الشباب البديع قلبوا خريفها ربيع وحققوا المعجزة.. صحّوا القتيل من القتل"


" اقتلني! قتلي ما هيعيد دولتك تاني باكتب بدمي حياة تانية لأوطاني دمي ده ولّا الربيع؟ الاتنين بلون أخضر  وبابتسم من سعادتي ولّا أحزاني؟"


 "متخافش على مصر يابا.. مصر محروسة حتى من التهمة دي اللي فينا مدسوسة  ولو انتا أبوها بصحيح وخايف عليها قوي  تركتها ليه بدن بتنخره السوسة؟ "


" وبيسرقوك يالوطن قدامنا عيني عينك ينده بقوة الوطن ويقولي: قوم.. فينك؟! "

 " لكن خلاص ياوطن صحيت جموع الخلق  قبضوا على الشمس بإديهم وقالوا لأ  من المستحيل يفرطوا عُقد الوطن تاني  والكدب تاني محال يلبس قناع الحق"


" بكل حب الحياة خوَّط في دم أخوك قول إنت مين للي باعوا حلمنا وباعوك.. أهانوك وذلّوك ولعبوا قمار بأحلامك  نيران هتافك تحرر صاحبك الممسوك"


" يرجع لها صوتها.. مصر تعود ملامحها تاخد مكانها القديم والكون يصالحها عشرات سنين تسكنوا بالكدب في عروقنا؟ والدنيا متقدمة ومصر مطرحها "


" كتبتوا أول سطور في صفحة الثورة وهما عُلما وخٌبرا مِداورة ومناورة وقعتوا فرعون هرب من قلب تمثاله لكن جيوشه مازالوا يحلمه ببكره"


يادي الميدان اللي حضن الفكرة وصهرها يادي الميدان اللي فتن الخلق وسحرها يادي الميدان اللي غاب اسمه كتير عنه وصبرْها ما بين عباد عاشقة وعباد كارهة


لا الظلم هين يا ناس ولا الشباب قاصر مهما حاصرتوا الميدان عمره ما يتحاصر

أتاريك جميل ياوطن مازلت وهاتبقى زال الضباب وانفجرت بأعلى صوت.. لأه حرضتنا نبتسم ودفعت إنت الحساب وبنبتسم بس بسمة طالعة بمشقة


فينك يا صبح الكرامة الّا البشر هانوا وأهل مصر الأصيلة إتخانوا واتهانوا  بنشتري العزة تاني والثمن غالي فتح الوطن للجميع قلبه وأحضانه

أولنا في الجولة. لسّه جولة ورا جولة ده سوس بينخر يابويا في جسد دولة أيوة الملك صار كتابة إنما أبدا لو غفلت عينّا لحظة هيقلبوا العملة


لكن خوفي مازال جوة الفؤاد يكْبِش خوف اللي ساكن شقوق القلب ومعشش يقوللي مش راح يسيبه ولسه هيقبّوا وهيلاقولهم سكك وبِبان متتردش

وحاسبوا قوي من الديابة اللي في وسطيكم وإلّا تبقى الخيانة منّكم فيكم الضحكة عالبُق بس الرك عالنيات فيهم عدوِّين أشد من اللي حواليكم


شكرا عبد الرحمن الابنودي
احضر حاجتي عشان انزل
ربنا يحفظنا جميعا :)

الصور و الثورة

بمناسبة ان فيه هاش تاج #DuringJan25 
افتكرت يوم 12 فبراير  يوم ما المخلوع اتنحي
 بجد كان يوم جميل اوي
للاسف كنت في البيت كمية التليفونات الي جاتلي  و العياط و الزعاريد
اتنحي اتنحييييييييييييييييييييييييييييييييييييييييييييييي
عمر اخويا كان عند قصر راس التين و ميعرفش انه اتنحي اتصلت بيه و قولتله
الفرحة كانت جميلة علي الكورنش و الناس بتحتفل
عملنا الي عالينا عالينا رئيسنا و خلعناه بادينا و الباقي علي الله"
ايوة محدش فكر ساعتها حنعمل ايه بكرة الصبح
البنت الي قابلناها علي الكورنيش و كانت بتصور فيديو ووقفت وصورت مع عمر و امير عشان معاهم اكل من كارلوس ماكلوش من الصبح و جايين مشي
ساعتها قولتلها احنا خلاص اتغيرنا بعد ما كنا بناكل كنتاكي بقينا بناكل من عند كارلوس
قابلت ناس اعرفهم  كانوا بيحتفلوا
المجند الي واقف عند القيادة و قالي دلوقتي بقه فيه مشير  واحد وراياه رد قاله علي نفسه يا بابا و قعد يصرخ : الشعب خلاص اسقط الرئيس
الناس دي فين ؟
يا تري عاملين ايه دلوقتي
حاجة واحدة احتفظت بيها من اليوم ده صورة
صورتنا احنا
ايوة الصورة الي باين فيها تعب ال18 يوم و بالذات اليوم الاخير
تعب المشي كل يوم من قائد ابراهيم لسيدي جابر قدام القيادة  عشان اكتشف اني سبت العربية في محطة الرمل و ارجع تاني اجيبها 
الصورة حتفضل موجودة و مش حتضيع
كل ما حنبصلها حنفتكر ايام جميلة و حنحكي عليها لاولدنا بالتفاصيل
 مش حنسيب الفلول يشوه الثورة و لا واحد زي مصطفي بكري يحكي عن ثورة هو مش فاهمها اصلا وعمال يحاول يزنق المجلس العسكري فيها
الصور بتاعتنا هي الي حتحكي لولدنا ان احنا الي عملنا ثورة مش حد تاني
الصورة بس حتحكي و تقول ان الشعب خلاص هو الي اسقط الرئيس

قانون الطوارئ.....

اول تعليق سمعته عن تطبيق قانون الطوارئ كان ضحكات عالية جدا كانك سمعت نكتة لا و نكتة جديدة نوفي وبعد وصلة ضحك سمعت التعليق : " احنا بنضيع يا وديع قانون طوارئ ايه الي حيطبقوه بس الناس دي جاية من خارج المجرة"
طبعا بعدها مزيدا من الهع هع هع و ضحك كانه نكتة بجد

اصل بصراحة قانون الطوارئ ده نكتة فعلا
حصلت احداث السفارة و بغض النظر عن الي حصل صح ولا غلط و ان التعليق عن الحدث كان البلد بتضيع و بالمناسبة ده التعليق الي بسمعه بقالي 9 شهور و بقه كانه لزمة حوار عادية من كل الاطراف انما الي حصل بعد احداث السفارة كان هو النكتة الحقيقية 

دعا شرف لاجتماع مجموعة العمل الوزاري الي بالمناسبة محدش عارف دي ايه بس اهم حيجتمعوا و خلاص كويس في العادي بنستني لنص الاسبوع عشان نحس ان في مسئولين 

الصبح شرف استقال و المجلس رفض الاستقالة .... جميل اجتمعوا و خلصونا
الاجتماع الحمد لله تم و طلع ببيان يا سلام طبعا الي القاه السيد وزير الاعلام ( الراجل ده اتعين عشان يقرا بيانات المجلس العسكري)
  ايوة ايه البيان
ان مصر بتمر بظروف عصيبة وه طبعا اكتشاف يدل علي سرعة البديهة الشديدة و بعد كده شوية لك لك لك و حنطبق قانون الطوارئ

طبعا الضحك تعالي بعد الكلام ده ليه؟؟؟؟؟؟؟؟
عشان قانون الطوارئ مطبق اصلا بقاله 30 سنة اين الجديد عزيزي المواطن؟

بعد يوم باين مش فاكرة ؟ طلع بيان ان القانون حيطبق بكافة بنوده ده بدعوي ان القانون كان مطبق جزئيا
طبعا كان التعليق كله كله ولا حته منه حته منه و لا كله كله
و مزيد من الضحك

تاني ان فيه فقرة مضافة علي القانون ؟
ايوة الي هي ايه حضرتك؟
ان فيه اضافة عشان الاشاعات و التحريض و شوية لك كده
مزيد من الضحك ماهو ده موجود بردوا في القانون سيادتك

النهاردة بقه التعليق الاخير ؟
أكد مجلس الوزراء أن قانون الطوارئ لن يتم تطبيقه على السياسيين أو المعارضين أو أصحاب الرأى ولكن سيتم التطبيق فقط على حالات الخروج السافر على التعبير السلمى عن الرأى أثناء المظاهرات وأحداث البلطجة التى تروع المواطنين الآمنين والعنف وإثارة الفوضى والشائعات.

يا سلام

دلوقتي بقه مافيش ضحك بصراحة
اصل ايه الهدف من كل ده
ان الناس تخاف طب خوفنا بحاجة جديدة ابتكر انما كده مافيش تعليق

طبعا الي حصل تعليقا علي قانون الطوارئ هي ردود الفعل العادية علي اي حاجة
فريق " لا لقانون الطوارئ" الي معتبرين الي حصل ده نكسة للثورة و عودة للخلف و لك لك لك
معلش يا اخوانا هو ايه الجديد القانون اصلا ساري

الفريق التاني " ايوة كده تمام تسلم يا مجلس - الله ينور يا سلطة " بصراحة الفريق ده اثبت عدم ابتكار علي مدي 7000 سنة الناس دي اجدادهم كانوا بينافقوا السلطة الفرعون و المماليك و الانجليز و الثورة بعد كده و مرورا بجمال عبد الناصر و السادات انتهاءا بالمخلوع
الابتكار الي بيتجلي في فريق " الله ينور يا سلطة" انه مبتكر في الاسباب الي خلته ينافق السلطة
طبعا اسباب التهليل لقانون الطوارئ تجيب تسمم فظيع
اولا : يمنعوا البلطجة و الفوضي و السرقة و قطع الطرق .... ماشي يا جماعة بس فعلا القوانين المدنية كافية تماما للتعامل مع كل ده
ما فيش جديد بصراحة في قانون الطوارئ الا انه بيطلق يد الداخلية في القبض علي اي حد لمجرد الاشتباه من غير لا تحريات ولا دوشة
وده نتج عنه قضايا كفته ولا ليها اي لزمة اصلا

ثانيا: يحافظا ويحموا ضباط الشرطة .... بغض النظر ان الداخلية فاشلة اصلا بس ايه شغل العيال ده حماية ايه الي هما عاوزينها و بعدين ماهو قانون الطوارئ  كان شغال في 28 يناير ايوة ايه الجديد
ضباط الشرطة عاوزين يحموا نفسهم بالبطش والطوارئ يبقوا مش عارفين يشوفوا شغلهم خالص و بصراحة يروحوا يتعلموا و يذاكروا عشان يعرفوا يشتغلوا بلا خيبة القوانين متعملتش عشان تحمي شوية فشلة مش عاوزين يشوفوا شغلهم

الخلاصة كده قانون الطوارئ و لا ليه اي 30 لزمة
لا حيمنع بلطجة و لا حيحمي شرطة و لا حيوقف احتجاجات 
و يا خسارة الورق الي اتكتب عليه تفعيل قانون الطوارئ و الوقت الي ضاع في مناقشة الولا حاجة

ميدان التحرير تحت الاحتلال

النهاردة يمر 12 يوم علي احتلال ميدان التحرير في اول يوم في رمضان
من اسبوعين كده كان الواحد عادي يفكر انه يروح ميدان التحرير
دلوقتي صعب اوي تفكر او تروح عادي زي الاول

معلش يعني هو الجيش قاعد في الميدان ليه
ايوة ليه؟
مش المجلس قوي و معاه تاييد الناس و واخد شرعيته من الاستفتاء
خايف ليه من  شوية ناس قاعدين في الشارع
ناس معهاش حاجة غير افكارها  احلامها و بس
ممكن يتقال انه مش عاوز الميدان يتقفل المرور فيه
ماشي معاكم حق

طب ما تفتحوا المرور و سيبوا الناس قاعدة

اصل الناس دي قابضة و بتاخد فلوس

طب بالذمة كده دي اشكال ناس قابضة

و بعدين ايه الدليل

ايوة الدليل هو بتوع الحزب الوطني و الداخلية لما يتقال عليهم حرامية بيتسال ايه الدليل

اشمعني بقه لما تتهم ناس انهم قابضيين مش عاوز حد يسال ايه الدليل

ولا هو طق حنك و لك علي الفاضي

الي حصل في اول يوم رمضان كان ليه لزمة و لا لا
بصراحة ما كانش ليه لزمة خالص

يوميين و في الاخر الميدان حيتفتح للمرور بصراحة كان علي اخر اليوم حيتفح

طب فتحت الميدان

رغم الطريقة الي الميدان اتفتح بيها

اديك فتحته قاعد ليه بقه

خايف ليه الناس ترجع؟

ايه الي ممكن يحصل يخلي الناس ترجع ولا هو من باب الاحتياط واجب

النهاردة لما قريت خبر المشير يزور ميدان التحرير

http://www.dostor.org/politics/egypt/11/august/12/50914

لاول مرة حسيت بخوف

و افتكرت كلمة اتقالت ايام الثورة

الميدان موجود لو عاوزين ترجعوا ارجعوا في اي وقت هو حد حيمنعكم

و ادينا سبنا ميدان التحرير

و عمرنا ما حنرجع تاني

المكان الوحيد الي المظاهرات رجعاله هو سلم نقابة الصحفيين

مش عاوزة اكون متشائمة بس خلاص

المظاهرات في الميدان بقيت حلم

الميدان احتلته الشرطة العسكرية خلاص

و بكرة تجيب طوب و اسمنت و تبني نقطة شرطة في الجنينة الي في النص

الاخوان من ميدان التحرير لجراند حياة !!!!!

حقولكم سر صغير

انا بحب الاخوان

ايوة بحب الاخوان

انا مش عضو في الجماعة

بس بحبهم او بلاش بحبهم مش بكرهم

معرفش ليه

الموضوع مالوش اي علاقة بموقفهم السياسية خالص لاني مش مقتنعة بمواقفهم السياسية خالص

الموضوع ان كل الي عرفتهم من الاخوان كانو ناس كويسة رقيقة المعشر

من الاخر ناس عادية لا هما متشديدين و لا هما خبثاءعاديين اخر حاجة مش اخوان تليفزيونين يعني

المهم

بالنسبة لي كانت جماعة الاخوان المسلمين جماعة خدمية ناجحة جدا و كمجموعة سياسية فا معرفش بالضبط انا مش بحب المواقف الرمادية خالص

ليا اصدقاء  و زملاء اعزاء من الاخوان المسلمين

بصراحة مكنتش مقتنعة بالصورة الذهنية و الحكومية الي موجودة للاخوان المسلمين عند غالبية الناس و بصراحة اكتر الصورة القاهرية الي بتخلط بين الاخوان المسلمين و الجماعات الاسلامية  و لما جه مسلسل الجماعة اظهرهم في اسوا صورة

مع بداية ايام الثورة كان الاخوان المسلمين مش ظاهرين اوي

 يمكن كان فيه ظهورين 

يوم 24 يناير المرشد قال ان الجماعة مش حتشارك رسميا  بس الي عاوز يشارك من الاعضاء مش حنمنعه

الظهور التاني كان يوم 27 يناير و كان خبر رسمي مسائي ان كل قيادات الاخوان اتقبض عليهم ( انا فاكرة كان منهم عصام العريان)

طبعا بين اليومين دول تولي خيري رمضان و تامر امين رسم الصورة الغريبة العجيبة عن اندساس عناصر من جماعة الاخوان وسط المتظاهرين السذج و هما الي بدؤا اعمال الشغب

 بعد يوم 28 يناير تولي الاعلام الحكومي بشدة و بعنف اتهام جماعة الاخوان المسلمين بكل حاجة

يعني هي الي فتحت السجون و هي الي خطفت الشرطة و هي الي عملت كل المصايب السودة من وجهة نظرهم

الانضمام الرسمي للجماعة في الثورة كان مع موقعة الجمل

بعدها رسميا اصبح الاخوان جزء من الثورة

بلال فضل - نجيب ساويرس و غيرهم كتير اعترفوا بدور الاخوان في موقعة الجمل

المهم توالت الايام و كانت جماعة الاخوان الكارت الي بيطلعوا النظام للغرب عشان يخوفهم من ترك مبارك للحكم

و طبعا محدش ينسي لقاء عمر سليمان الشهير بتاع The britherhood of Musliums

و هيييييييييييييه مبارك مشي

و بدا الكلام عن ان الاخوان فصيل مهم من المجتمع المصري و قد ايه هما منظمين و اقوياء

طبعا بدات اصوات خافتة تظهر ان احنا اضعف و هما حيخدوا غالبية المجلس و يا لهوي ويا مصيبتي

لحد ما بدا يظهر معلش ناس شديدة التشدد و كلام عجيب غريب عن الدولة الدينية  

بدا بقه كلام احنا مش مستعدين الاخوان حيعملوا دولة دينية 

لحد ما جه الاستفتاء

و بدل ما الاخوان يدعو للمشاركة و بس لا دعوا للاجابة بنعم علي التعديلات الدستورية

و بدا اول شرخ في جسد الثورة بدات حالة عالية من الاستقطاب

انت معايا و لا ضدي

و انتهي الاستفتاء بنعم

و تم تفسيرة انه انتصار للاسلامين معرفش ازاي

المهم عدينا مرحلة الاستفتاء

و بدئنا مراحل جمعة معرفش ايه و ابصر ايه و شوف انا ببقه مالي الميدان و انت لا

و جمعة الوقيعة

الدستور اولا و لا الانتخابات

صبحي صالح

تصريحات هنا و هناك بصراحة نصها اشاعات

اخوان اون لاين

و جت اجر جمعة الي بعدها تم اعلان اعتصام مفتوح

و بدات الهرتلة الي متعرفش مصدرها ايه

المعتصمين غلطانين و اعتصامهم خطأ لحد ما تم و صفهم انهم حشاشين علي موقع الاخوان الرسمي اخوان اون لاين 

يا اهلا

لحد يوم السبت الي فات

الاخوان بيحتفلوا في جراند حياة بحزبهم الجديد و الثوار بيضربوا ولا بلاش ثوار فيه مصريين في العباسية بيضربوا

انا مش بلوم علي الحفلة

معادها كان متحدد من قبل كده مع انها كانت ممكن تتلغي  او تتاجل

ماهو محبكش حفلة دلوقتي

و ياريتها كانت حفلة شعبية لاعضاء الجماعة و الناس العاديين

لا كانت حفلة في جراند حياة اتعزم فيها وزير الداخلية

هات اي وزير انما وزير الداخلية

 عاوزة اعرف امتي الاخوان اتنقلوا من التحرير لجراند حياة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

http://www.ikhwanonline.com/media/PhotosAlbum.asp?MainCatID=2&SubCatID=17&AlbumID=852

امتي بعدوا عن الشارع ؟؟؟؟

احب بس اقول حاجة اخيرة انتو المرشحين الي ورا ستة ابريل علي طول

الي قعد يشتم في الاخوان طول عمره و منع ابناءهم انهم يدخلو الجيش و يمسكوا مناصب مش هو الي فجاة بقي بيحبهم و يحضر حفلة الحزب بالسهولة دي و يبارك و يهني

الناس دي لسه شايفاكم الجماعة المحظورة

جماعة الاخوان مش الحزب لسة مش مشهرة في وزارة الشئون الاجتماعية

يعني لا مؤاخذة انتوا لسه الجماعة المحظورة

و اول ما الي في التحرير يسكتوا حتكونو انتو الهدف التالي

و لو القيادات هي الي حتتحبس كنا قلنا ماشي

 انما المصيبة ان الصغيريين هما الي حيتمسكوا وبتسحلوا

 القيادات تطلع مع يسري فودة و مني الشاذلي تتكلم عن الاضطهاد الي بتتعرضله الجماعة رغم دورها في الثورة

جماعة الاخوان اليس فيكم رجل رشيد؟؟؟؟

اااااااااااااااااااااااااه وائل الكومي اترقي!!!!!

وائل الكومي اترقي
  ايوة الي قتل 15 متظاهر في اسكندرية
http://elbadil.net/%D8%A3%D9%85%D9%8A%D8%B1%D9%87-%D8%B4%D9%87%D9%8A%D8%AF%D8%A9-%D8%A7%D9%84%D8%A5%D8%B3%D9%83%D9%86%D8%AF%D8%B1%D9%8A%D8%A9-%D9%82%D8%AA%D9%84%D8%AA-%D8%A8%D8%B1%D8%B5%D8%A7%D8%B5%D8%A7%D8%AA-%D8%A7/

http://elbadil.net/%d8%a3%d9%87%d8%a7%d9%84%d9%8a-%d8%b4%d9%87%d8%af%d8%a7%d8%a1-%d8%a7%d9%84%d8%ab%d9%88%d8%b1%d8%a9-%d8%a8%d8%a7%d9%84%d8%a5%d8%b3%d9%83%d9%86%d8%af%d8%b1%d9%8a%d8%a9-%d9%8a%d8%b1%d9%88%d9%88%d9%86/

ايوة الي كنا بندعي عليه كل يوم في المظاهرات

ايوة الي كان ناوي يهرب برة مصر و اتجاب من المطار
http://www.idarelsalam.net/node/527

 ايوة السفاح بتاع قسم رمل تاني
http://www.arabawy.org/tag/%D9%88%D8%A7%D8%A6%D9%84-%D8%A7%D9%84%D9%83%D9%88%D9%85%D9%8A/

ايوة الي بيتحاكم دلوقتي
http://shorouknews.com/contentdata.aspx?id=413706

الي فضايحه و ممارساته من قبل الثورة كمان
http://www.amlalommah.net/new/index.php?mod=article&id=10240

انا ماكنتش مصدقة بس دي الحقيقة
للاسف الحقيقة المرة
انا فيه نار جوايا 
معلش  بقه كده احنا اتضحك علينا
حيستبعدوا قتلة الثوار في الحركة الجديدة
بس هما راقوا القاتل في الحركة
انا ما كنتش عاوزاها يتفصل  انا بس كنت عاوزاه يتوقف عن العمل

مش حستني تقرير حقوقي عن حركة الداخلية الجديدة
انا لسه ليا عقل
الحقيقة الوحيدة الي موجودة ان الكومي اترقي
و راح مباحث الكهرباء حياخد مرتبه و علية نسبة من المخالفات علية 10%
الا لعنة الله علي الظالمين

عشان بس تتأكدو من كل الي قولته

اتقوا الله.... يرحمنا و يرحمكم الله؟؟؟؟

الحديث عن الشهداء بيوجع القلب
بس بقة واضح انه بيوجع قلبي انا بس
الي مش قادرة اتخيله ان فيه ناس لسه بتشكك و بتسأل

من كام يوم في حوار لطيف مع احد زمايلي اختلفنا كالعادة عن الاعتصام
انا مقتنعة ان الاعتصام عشان حقوق الشهداء  و المصابين و عشان الداخلية ما ترجعش زي ما كانت فوجئت انه بيسألني سؤال انا مش مصدقة انه سأله هو مين شهيد الثورة؟؟؟ طبعا مردتش عشان كنت علي وشك الشتيمة و لانه عزيز علي قلبي فا اكتفيت ان ابص له و امشي و انا مش مصدقة ان فيه حد بيسأل السؤال ده
بس علي فكرة مش اول مرة اتعرض للموقف ده 
قبلها كان مع واحدة صاحبتي كانت بتنتقد ريم ماجد طبعا الانتقاد كان انها كانت معرفش ايه و بقيت ازاي مذيعة و عاملة بتفهم و تاكيدا علي كلامها قالت دي كانت بتسأل عن الناس الي اتدفنوا  في مقابر الصدقة ( دول كانوا مجهولين) تخيلي بتدافع عنهم  و بتقول عليهم شهداء الثورة المجهولين دول ناس بلطجية و مساجين اهلهم رفضوا يستلموهم دول كانوا بلبس السجن
بصراحة انا وقتها حسيت بالقرف الشديد عشان بفترض ان الناس دي مش كويسة مع انهم بين يدي رؤف رحيم لم يطلبوا تكريم ولا فلوس و لا اي حاجة دفنوا في مقابر الصدقة في الامام الشافعي
كل اعتراض ريم ان ليه محدش قال عشان نصلي عليهم كلنا
فيه ناس استكترت عليهم حتي الصلاة  الصلاة الي ممكن تكون سبب في تكفير ذنوبهم
وقتها الخاطر الي جالي يا ساتر هو فيه ناس كده كل ده عشان ريم ماجد يععععععععععععع

بس لما زميلي سأل من هو الشهيد استغربت اكتر ؟؟
كلمة شهيد مشتقة من الجذر الثلاثي شهد، ويقال إستشهد أي طلبت شهادته لتأكيد خبر قاطع أو معاينة، وإستشهد في سبيل كذا أي بذل حياته تلبية لغاية

 بس مين يقدر يحكم علي اي حد انه شهيد او غير شهيد
بصراحة قرفت 
عشان نقول الثورة وحشة نشتم في ناس بين ايدين ربنا
نخوض في ضمائر الميتين
مش حيقوموا عشان يدافعوا عن نفسهم و لا يردوا كلمة باطل قيلت في حقهم
مش حيردوا اذا كانو بلطجية او مسجلين خطر
مش حنعرف اذا كانو رايحين القسم يردو ظلم او يمنعو ظالم  ولا رايحين يسرقوا و يقتلو ويحرقو
مكان موتك جعله بعض الناس سبب في اتهامك ناسيين انه و ما تدري نفس ماذا تكسب غدا و ما تدري نفس باي ارض تموت
و موتك امام القسم جعله البعض  سبب ان امك ما تزعلش عليك
خلاص حنحسب الي ماتو قدام الاقسام بلطجية يلا ايه يعني ليهم اسر و اصدقاء امهات و ابناء يلا ايه يعني لما نوصم اهلهم بالعار 
ايه يعني لما نحرق قلب ام علي ابنها و نقولها دول بلطجية وهي مش عارفة ترد اصل حترد تقول ايه
من لا يخاف الخوض في سيرة الميتين مش حنجادله و لا نتناقش معاه عشان خسارة
حنسيب كل ده ليحكم الله بيننا يوم القيامة

بس بصراحة مش قادرة اعرف ليه؟؟؟
كل ده عشان الباشا ما ياخدش حكم الباشا ده اي حد رجل اعمال -ضابط - وزير داخلية - رئيس جمهورية مش مهم المهم مايضيعش عشان دول
كل ده عشان الثورة تطلع وحشة و خربت البلد
كل ده عشان الفاسد ما ياخدش عقابه و يفضل زي ما هو

بس حتعملوا ايه يوم القيامة ؟؟؟؟ حتقوله ايه لربنا ؟؟؟ اتهمتهم بالباطل ليه ؟؟ ايه دليلك انهم بلطجية ؟؟؟؟
انا احتسبهم عند الله من الشهداء طلعوا مش شهداء حسابهم عند الخالق

اتقوا الله في من مات و كفاية حرام عليكم  حاجة اخيرة البوست دي لقيتها علي الفيس ممكن نقراها؟؟؟
 ""صورته في السونار. تكبيرك في أذنيه بعد الولادة. تصويرك لأول ابتسامة له. فرحتك بضمة أصابعه الصغيرة على سبابتك إذا قربتها إليه. تسجيلك لتاريخ أول كلمة(بابا) ينطقها. نزولك لتصويره صور المدرسة الـ4×6. قرف الدروس لكي يكون «أحسن منك». خوفك عند تأخره في العودة من أول رحلة. ضحكه معك وتعللك الدائم بـ(الشغل) إذا ما طلب منك أن تلعب معه. حلمه بأن يصبح طبيبا. تعليماتك له وأنت تعلمه حلاقةالذقن. خناقات الثانوية العامة.. رعبك من أن يكون «بيشرب سجاير من وراك». فخرك به في أول يوم جامعة. احمرار وجهه بعد تلقيه مكالمة من إحدى زميلاته. صيحاتك معه والأهلي يحرز هدفا. زهقك من فتحه للجرنان قبلك. غضبك من استيلائه الدائم على ملابسك لأن مقاسكما أصبح واحدا. تفكيرك الدائم في كيفية تأمين مستقبله، وشراؤك للشقة التي سيتزوج فيها. عدم اقتناعك بالفتاة التي يريد خطبتها. تحذيرك له من النزول يومها. الصوت الغريب الذي يأتيك من موبايله، وهو يؤكد أنه في المستشفى. استلامك لجثته من المشرحة بعد جمعة الغضب. خروجك للميدان تنادي باسمه وتقبل صورته بين الحين والآخر. فخر الجميع بـ(أبو الشهيد). اشتياقك لحضنه ورائحته ويقينك أن ما ذهب لن يعود. ثم يخرج العيسوي وضباطه متهمين إياه بأنه بلطجي وأنهم كانوا يدافعون عن أنفسهم. تدرك أنك ستقابله في مكان مليء بنور على نور. بينما سيذهب الآخرون لأقذر وأحط مزابل التاريخ"""

حزب الكنبة

بصوا بقه حزب الكنبة ده خنقني
عمالين يهرتلوا هرتلة السنين المصيبة انهم اليومين دول زادوا اوي اوي
انا خلاص مش قادرة استحمل
كنت بفتخر ان اسكندرية ما فيهاش فلول او اي حد في حزب الكنبة خالص
دلوقتي بقه فيه
انا بقسم حزب الكنبة ده لنوعين: الاعضاء الاصليين و الاعضاء المنضمين حديثا
الاصليين دول بقه عاشوا طول عمرهم علي الكنبة و عمرهم ما سبوها خالص الناس دي ضايعه يا جماعة بس بصراحة هما ليهم مساهمات اساسية في الثورة كانوا بيكسرو مجديفنا و كل شوية عمالين يقولوا كفاية كده عاوزين نرجع الشغل ده علي اساس ان الشغل كان مقطع بعضه قبل الثورة ببساطة الناس دي لو سمعنا كلامهم كان زمنا ضايعيين من زمان
الشباب المنضمين حديثا دول اول ما مبارك غار رجعوا مكانهم تاني علي الكنبة غالبا حتلاقيهم نزلوا التحرير بعد معركة الجمل و لما الدنيا بقيت امان 
بصراحة كده الخزعبليات بتاعة حزب الكنبة و الفلول زادت اوي
عندهم اعتقاد تام ان كده كفاية
ايمانهم لا يتزحزح بالسلطة الابوية و يعني يوم ما عترضوا علي مبارك كان انجاز
خايفين ان المجلس العسكرييمشي احسن حنضيع لا معلش يا حبايبي احنا مش حنضيعك  المجلس هو الي لو مشي حيضيع انما احنا زي الفل
قال ايه قال ايه بيقول ان القضاء نزيه معلش و الله يا شباب كان علي عيني القضاء فيه الكويس و فيه الوحش بس واضح ان الوحش زيادة حبتين مش لازم يكون حرامي او مرتشي عشان اقول عليه وحش كفاية استغلال النفوذ
 مش محتاج انه يسرق ده مش اوبشن ده بيلت ان فيه
الي جاية دي جامدة
بيقولك الداخلية بقيت كويسة معرفش الكلام ده حصل امتي بس بصراحة السادة اعضاء حزب الكنبة هما الي قرفونا بالانفلات الامني و البلطجية و بردوا هما الهبل الي صدقوا ان العربية لو مضيت علي مبايعة تبقي كده بعت العربية
من غير لا ترخيص و لا يحزنون ده انت لو سارق العربية و حبيت ترخصها حتوب والعربية مش حتترخص ده كفاية تروح تجيب ملف العربية من المرور
طبعا دايما عندهم مبرر للافعال الوسخة لضباط الشرطة من اول ضابط المعادي و حتي مأمور قسم الازبكية
و لو هما اتعرضوا لموقف من الداخلية وقلتلهم اشتكوا تلاقيهم يتراجعوا بسرعة و ما يشتكوش

طبعا عندهم اعتقاد ابدي انهم يرضوا بقانون الطوارئ و لا يتحكموا بالاحكام العرفية
و كل ما حد يعطس في الشارع يقولك الجيش حيدايق و يعلن الاحكام العرفية
طبعا ده علي اساس ان الناس عادي جدا يرضوا بالاحكام العرفية
اليومين دول بقه و مع الاعتصام في ميدان التحرير
ظهرت لهم صفة جديدة هما بقوا جنرالات مقاهي بيخططوا و يحللوا من علي الكنبة
طبعا يوم الاعتصام قالك الجيش حينزل يضرب و يعلن الاحكام العرفية طب ليه يقولك اصل كده كتير اوي الناس دي نسيت نفسها خلاص
النهاردة بقه بيقولك حينزلوا فرقة مظلات علي ميدان التحرير و يفضوا الاعتصام
يعني معلش بقة الجيش مش هو المجلس العسكري خالص
الجيش ده انا و انت و جيرانا  عمر ماحد في الجيش حينزل يخارب مصري زيه انسوا بجد
و بعدين لو كانو ينفع يضربوا مضربوش ليه من اول يوم من يوم 28 يناير
الي بيحارب الثورة هو المجلس العسكري مش الجيش فيه فرق كبير
شوية و يرجع يقولك البلطجيو حيهجموا عليكم كفاية ارجعوا  المجلس من الاخر كده خايف و مرعوب من الثورة
السلطة دلوقتي في ايد الشعب و المجلس العسكري و الحكومة مهمتهم ينفذوا و بس
انما خوف و نحنحة فا مش ناقصين
طول عمر حزب الكنبة قاعد ساكت و سايبين الزبالة تملا كل حته فيها
دلوقتي و هيا بتنظف جايين تقولوا ان فيه غبار و خايفين الصرصير الي تحت كومة الزبالة تتطلع
معلش بقه نقطونا بسكاتكم
الجيش لو ضرب حيضربنا احنا الي خربنا البلد انما انتم فا مش حيحصلوكم حاجة الكنبة موجودة و الفشار موجود وضعكم امن تماما
فا يا ريت تسكتوا يرحمكم الله


محدش حيضرب حد  اسكتوا شوية سكان القمر مش حينزلوا التحرير

المجلس صحي ولا لسه.....؟

الساعة التاسعة صباحا
اول يوم بعد ليلةالاعتصام الاولي
و المجلس العسكري لا حس ولا خبر
يا تري ناوي علي ايه يا مجلس
طبعا التعليقات نازلة ترف علي دماغ المجلس من امبارح؟؟؟ تعليقات ساخرة طبعا
المحافظات المشاركة في الاعتصام حتي الان 7 محافظات: ميدان التحرير القاهرة - مسجد القائد ابراهيم الاسكندرية - ميدان الاربعين السويس - ميدان المحافظة المنصورة - ميدان الممر الاسماعلية - امام مبنى المحافظة بمدينة أسيوط - - ميدان المنشيه ببورسعيد
طب و بعدين حنستني كده كتير انا خايفة يسيبونا نرن و محدش يسأل فينا و لا يعبرنا
خايفة كمان من النفس القصير و حزب الكنبة و قلق كل يوم ان العدد يقل و البلطجية تهجم؟
الحكومة و الداخلية المجلس سربهم علي كوكب زحل مش موجودين ولا حس و لا خبر
و المجلس شكله مستني يشوف الدنيا حترسي علي ايه
هو ليه السلطة في مصر مصرة علي رد الفعل فيه فيرس موجود علي الكرسي بيخلي التفكير بطيئ و غبي
يعني شوية ضباط ولا يسوه قرش صاغ فاسدين و زبالة المجلس بيدافع عنهم
يا عم ارمي الداخلية كلها اصلا و اعمل واحدة جديدة
فيه حد يحط بلد بحالها قصاد شوية ضباط مجرمين ولا يسوا
الناس دي اتحرقت خلاص و مالهمش لزمة
ارمي يا مجلس و اشتري نفسك
الي ضيع مبارك انه استني و شكلكم غاويين تستنوا
او ليكم في الافلام العربي الحل دايما بيجي في اخر لحظة
بس علي فكرة ده مش فيلم عربي
و العقدة بتتعقد كل يوم اكتر
الحقوا نفسكم الوقت بيمر بسرعة البرق

المعاشات الزيادة بتاعتها راحت فين؟؟؟؟؟

الزمان: بعد الثورة بكام شهر
الدولة حتزود المعاشات ايوة الفئة الي كانت حكومة نظيف ناسياها تماما
تزود الناس 15 % و المعاشات  تزيد من 7%-10% و لاعزاء للمعاشات كل الناس عندها حد ادني الا اصحاب المعاشات
الاجور المتغيرة العلاوة التأمين الصحي حاجات كانت منسية نوع من الاساطير بالنسبة لمستحق المعاش
جت الثورة 
و في بداية المرحلة الرومانسية مع حكومة شرف السادة اصحب المعاشات غرقوا في العسل: حنزودكم و علاوات منسية حتخدوها و الحد الادني 800 جنية و مش ناسيين مستحقي معاش السادات

للتفاصيل اكتر :

http://economy.akhbarway.com/news.asp?c=2&id=89554


http://www.egynews.net/wps/portal/news?params=127473

http://www.alwafd.org/index.php?option=com_content&view=article&id=58650:800-%D8%AC%D9%86%D9%8A%D9%87-%D8%AD%D8%AF%D8%A7%D9%8B-%D8%A3%D8%AF%D9%86%D9%89-%D9%84%D9%80-%D8%A7%D9%84%D9%85%D8%B9%D8%A7%D8%B4%D8%A7%D8%AA&catid=98:%D9%85%D8%AD%D9%84%D9%8A%D8%A9&Itemid=92#axzz1R46at6s5

الزمان : 2-7-2011
امام الصراف الالي لبنك مصر
الست لسة ساحبة من المكنة و بتعد الفلوس
فيه حاجة يا ست الكل
لا مافيش متعرفيش ازاي اعرف فاضل اد ايه في الحساب بعد ما شرحتلها و جابت الورقة لقيتها بتقول يخرب بيت ابوهم الزيادة ما نزلتش
زيادة ايه بس يا حاجة زيادة المعاش  طبعا تخيلت ان الزيادة لسه شوية عليها اكيد في اخر الشهر لسه الست طبعا بصتلي و قالتلي جايز بردو

روحت البيت بعد ما جبت لامي المعاش طبعا الي مافيهوش زيادة و حاولت اقنعها ان الزيادة اخر الشهر بس علي مين ؟
علي النت و علي موقع المصري اليوم كان الخبر الي مش سعيد انتهي العصر الرومانسي  و كان الخبر  مافيش زيادة يا جماعة بخ كده تعيشوا و تاخدوا غيرها

الحكومة تلغي «زيادة المعاشات» في الموازنة الجديدة

http://www.almasryalyoum.com/node/473674 

 

و طبعا التعليق الوحيد هو الشتيمة و شتيمة قبيحة كمان

 

الزمن : النهاردة الصبح عند واحد بتاع جرايد

 

واحد راجل محترم جدا اشتري المصري اليوم ناول البياع 50 جنيه و عقبال ما بيلملوا الفكة كان الراجل فتح الجرنال و هوب سمعة صرخة يا نهار ابوهم اسود

 

لسه حسأله  لقيته عمال يتكلم  الزيادة راحت  هي كانت فلوس ابوهم  دي فلوسنا

استهدي بالله كده حضرتك كأنك ضربتوا و لا موته بسكينة الفلوس الي انا دافعها لو كانت في البنك كانت جبتلي عائد اكبر من المعاش انا فضلت 30 سنة ادفع تأمينات و معاشات و في الاخر و لاد الكلب ضيعوها يوسف بطرس غالي سرقها و دول مش عاوزين يدونا زيادة

 

ده حال السادة اصحاب المعاشات عصام شرف اخد في اليومين الي فاتوا دعاء ربنا يجعله من حده ونصيبه

لما الواحد بيطلع معاش بيتحرم من العلاوات و بياخد زيادة 10% بس

و كان راضي تماما بنظرية مش حناخد زمنا وزمن غيرنا

جت حكومة شرف و عايشة الناس في العسل ان خلاص حتتنغنغوا يا جماعة حتعيشوا حننصفكم و حتبقي عيشتكم فلة

علي فكرة الزيادة كانت حتتصرف علي العلاج و المعيشة مش حتتحوش

دلوقتي المجلس العسكري رفض الموازنة قامت الحكومة لغيت الزيادة ولا من شاف و لا من دري بخ خلاص

عيب علي حكومة بتتمحك في  الثورة

طبعا بدأوا بالمعاشات عشان مالهومش صوت

شوية و حتدعي الفقر اكتر  و تلغي زيادة الموظفين او تقللها من باب اجيب منين

 

بس فعلا هي الزيادة راحت فين؟؟؟؟

 

البلطجي و المواطن

مين هو البلطجي؟
دايما كنت بسأل نفسي السؤال ده بس بصراحة بطنش اني افكر مين هو البلطجي لحد ما قامت الثورة في 28 يناير معلش انا شايفاها كده يوم 25 يناير ده كان تسخين معلش
بس بجد مين البلطجي؟ انا شايفاه الشخص الي بيطلع في وشك مطواة و عاوز ياخد الي في جيبك اي حاجة معاك......معلش ده بيسرق سيادتك مش بيبلطج
خلاص بيبيع مخدارات...... لا معلش ده تاجر مخدرات
اوفففففففففففففف يعني مين هباب البرك البلطجي ده؟
ده واحد ما بيشتغلش ولا ليه مصدر بيعيش انه يسرق يتاجر بالمخدرات ساعات بيتأجر عشان يضرب حد يكسر محل يسحل حد اي عمل مخالف للقانون وخلاص
طبعا البلطجي بيقفل اللجان الانتخابية و اكيد مسجل خطر طبعا
كل الناس تقريبا شايفه البلطجي بيعيش في المناطق العشوائية و علي فكرة دي غير المناطق الفقيرة
المناطق العشوائية هي مناطق طلعت لنا مرة واحدة و ماكانش فيها اي نوع من الخدمات خالص بعد كده وفقت اوضعها و دخلت لها الخدمات  انما فضلت نقصها التخطيط

اعتقد كلنا متفقين علي الكلام ده
 اول مرة اسمع فيها عن ان دول شكلهم بلطجية كانت بعد تنحي مبارك كان فيه ناس في الميدان و عاوزين يعقدوا و بياعين سريحة و كده
سمعت واحدة صاحبتي بتقول ان مامتها بتقول دول شكلهم بلطجية ماشي عدي الموضوع و خلاص طبعا كل فاكرين المرحلة دي مرحلة الرومانسية في العلاقة بين الشعب و الجيش مرحلة رصيدنا لديكم يسمح

طبعا البلطجية دول كانوا سلاح الرهاب في الايام الي بعدها بصراحة البلطجية كانت ليهم ايادي بيضاء علي الثورة المضادة و خوفوا ناس كتير طبعا الاشعات الرهيبة عن البلطجية الي وقفوا اتوبيس المدرسة و رموا بيض علي العربيات و الحاجات الهبلة دي كلها الي لقيت ناس لامؤاخذة هبلة صدقتها المصيبة ان الناس دي كانت متعلمة و علي قدر عالي من التعليم ايام و عدت لكن الايام دي رسخت حاجة واحدة وبس ان شكله بلطجي شكله وحش

لحد ما عدت ايام و شهور و ظهرت احداث مسرح البالون طبعا قبلها كل ما اشوف حد راجع من عند ماسبيرو يقولك دول شكلهم بلطجي شكلهم مش ولابد كان الي بيتكلم ده امير موناكو مثلا  الكلام ده كان علي اهالي الشهداء و سكان منطقة دار السلام الي مش لاقيين شقة يعيشوا فيها

29 يونيو قابلت حد ساكن عند التحرير و قالي نفس الكلام دول شكلهم بلطجية طبعا كان فاضلي تكة و اضربه بس مسكت نفسي و سألت و مين الي قال انهم بلطجية  قالي انت مش شايفة شكلهم عامل ازاي و لابسين ايه

الحكم بالشكل ؟ اتحكم علي اهالي الشهداء دول انهم بلطجية عشان شكلهم كده ولابسين كده
طبعا المفروض ان فيه زي للمواطن المصري اه لازم يلبس من كارفور المعادي و المهندسين عشان يعجب السادة العظام بتوع حزب الكنبة لازم يمشي علي مزاجهم عشان يعجب و يسرح شعره زيهم
اوعي تنزل المظاهرة مانكوش احسن يقولوا عليك بلطجي انتي يا بنتي لابسة اسدال ولا نقاب ولا حتي خمار كده بقيت اخوان او سلفيين و انت يا عم ايه الي انت لابسه ده جلابية لا لا لازم تلبس بنطلون جينز و تي شيرت حلو كده عشان ما يتقالش عليك بلطجي
الناس دي اعتصمت يا سادة عشان عاوزين حقهم مش حيثبتك بمطواة و ياخد الي في جيبك خالص عاوز حقه المدني و الاجتماعي الي انت وعدته بيه مش عاوز حد يضغط عليه عشان يتنازل عن القضية و ما يشهدش فيها مش عاوز حد يعاير ولاده ان ابوهم بلطجي انما لو ابنه بقي هو الشهيد فخلاص معدتش تفرق حته من روحك مشيت و راحت املك في الدنيا مات الي كنت مستحمل عشانه راح تقعد ليه يلا انزل عشان تموت و تخلص
يا ريت يحسوا بيهم مش ذنبهم انهم فقرا مش ذنبهم انه ذوقهم في الهدوم مش عجباك
علي فكرة لو لبست نفس اللبس الي هما لابسينه حتبقي بلطجي بردوا
نفس الكلام اتكرر في اول يوم بعد الثورة سواق التاكسي بتاع المعادي الي اعتدي علي البيه الضابط؟
اول حاجة سمعتها اصل ده سواق تاكسي انت مش شايفة بيعملوا ايه
معلش بقه سواق التاكسي ده بطل غصب عن عين التخين الراجل ده نازل علي باب الله ميعرفش رزقه النهاردة كام حيكفي ولا لا عليه اقساط و بيت و عيال لو حضرتك كسرت عليه و خبطت عربيته فارك جمل عنده بيصرخ من غلبه عشان لو صحي الصبح مش قادر ينزل مش حيلاقي ياكل
الناس الي حضرتك بتقول عليهم فقرا وبلطجية دول هما الي بيعيشوا حضرتك هما القوة الشرائية هما الي بشتروا الي انت بتنتجه هما الي بيتعالجوا عندك و بيشتروا الدوا من الصيدلية بتاعتك دول الي ولادهم بياخدوا دروس خصوصية عندك
علي فكرة الفقير مش بيحوش الفقير بيصرف عشان يعيش الاغنياء بس هما الي بيحوشوا
الي حيقولي تاني اصل شكله بلطجي يقرا الفاتحة علي روحه

طبعا يا ريت لو شفنا الفيديو بتاع بلال فضل مع اهالي الشهداء يمكن نغير رأينا الموضوع مش بالشكل خالص

القاهرة - الاسكندرية رايح جاي

باعتبار اني ديه اول مرة اكتب فيها عن اي حاجة قررت اني اكتب عن عقدة حياتي
العقدة دي بقالها سنة و كام شهر
عقدتي القاهرة و اسكندرية
انا موجودة اربع ايام في القاهرة و ثلاثة ايام في اسكندرية طبعا حياة سعيدة جدا
بحاول افتكر الظروف الغامضة الي خليتني اقرر اني اسيب حياتي السعيدة في اسكندرية و اجي القاهرة بصراحة هي لحظة غضب بس طولت شوية
مش مهم ايه الي خلاني اجي المهم حياتي شكلها ايه
حياة جميلة جدا
اولا انا مفقوسة في القاهرة اني من اسكندرية مفقوسة زيادة عن اللزوم من اول ماحط رجلي في اي حتة لحد ما امش منها
مرة دخلت فرع اتصالات في اكتوبر و اول ما فتحت بقي لقيت الشخص اللطيف الي واقف قدامي بيقولي حضرتك من اسكندرية .... ايوة .. اهلا وسهلا
في هايبر و انا بطلب اي حاجة اي حاجة  حتي لو لمونة الاقي نفس الابتسامة اللزجة هو حضرتك من اسكندرية
ثانيا انا بالنسبة ليا الجومة حتفضل جومة و المستيكة حتقضل مستيكة مش حتغير يا ريت سكان القاهرة يتعلموا لغات
ثالثا عربيتي للاسف ملاكي اسكندرية ايوة عربيتي ملاكي لسة ماخدتش 3 حروف و الكلام ده لحد2013  طبعا لكم ان تتخيلوا الحياة في شوارع القاهرة انا بتشتم طول النهار عشان سكان القاهرة العظام عندهم اقتناع عظيم اني كل الاسكندرانية مبيعرفوش يسوقوا ايوة فعلا مع اني بصراحة شايفاة ان القاهريين بيسوقوا سواقة ترع و جرارات  بس عادي مش دي المشكلة المشكلة الحقيقية في الكماين انا بقف في كل الكماين في القاهرة ليه معرفش فيه حد قالي اصل عربيتك و اشمئز شوية ملاكي اسكندرية معرفش ايه العلاقة بس مش مشكلة
طبعا العقدة الحقيقية فعلا اني مش عارفة اعيش ايوة انا يا اما مسافرة او بستعد اني اسافر و مش لاقيه حاجتي خالص لاني الحاجة الي بدور عليها في البلد الي انا مش فيها دلوقتي
بس بصراحة الحياة علي سفر علي طول مش وحشة اوي فيها مميزات كتييييييييير اولها اني عارفة اماكن الرادرات علي الصحراوي و اسامي السادة الضباط الي ماسكينها و اسم الحيوان الي مقليبني في 50 جنيه قبل كده و قالي انه حيعملهالي مخالفة حزام و مدنيش بيهم ايصال
و لما قلت لحد من زمايلي قال كلمة حكمة مصر مش حتنسالك انك كنت السبب في رفع دخل الظابط ده تعيشي و تاخدي غيرها
طبعا ده غير اني الوحيدة الي مش متأثرة بالتحويلات علي الصحراوي عشان اتبرمجت خلاص عليهم لما الاقي واحد بيشتكي ان فيه تحويلات كتير بصراحة بستغرب جدا هو المسافر علي الطريق الصحراوي ايه غير شوية تحويلات و مطباطت فوق بعض
طبعا انا التاه الابدي في القاهرة الكبري و الضواحي و طبعا انا دلوقتي خبرة جمدة جدا في التوهان و قبل ماعمل اي حاجة لازم اسال 3 سواقين تاكسي عشان اعرف اوصل اي حته
عموما انا بدأت اتعود علي العقد دي عادي اديني عايشة و ربنا يسهل 

اول مرة

مش عارفة ليه قررت فجأة يكون عندي مدونة
انا من النوع المتفرج دايما بتفرج و بس ممكن اقول رأيي و بس انما اني اعمل لا خالص
بس مش عارفة ليه قررت اني اشارك افكاري عن كل حاجة حكتبها
و باعتبار اني مش عارفة اي حاجة حتي اني مش عارفة ازاي افتح المدونة تاني فا انا قررت اسميها مش عارفة
كمان فيه سبب تاني اني كل محد يسالني عن اي حاجة بقول مش عارفة
يلا مش مهم معدتش تفرق
شكرا ان فيه حد حيقرا الكلام الي بكتبه